کسٹم ڈپارٹمنٹ نے ممبئی ایئرپورٹ پر ایک ہی دن میں 32 کروڑ کا 61 کلو سونا ضبط کیا، دو خواتین سمیت سات گرفتار۔

ممبئی: کسٹم ڈپارٹمنٹ نے اتوار کو ممبئی ایئرپورٹ پر ایک ہی دن میں 32 کروڑ روپے کی مالیت کا 61 کلو سونا ضبط کیا۔ اس معاملے میں دو خواتین سمیت سات لوگوں کو گرفتار کیا گیا ہے۔ ممبئی کسٹم ڈپارٹمنٹ کی تاریخ میں ہوائی اڈے پر ایک دن میں یہ سب سے بڑی ضبطی ہے۔

محکمہ کسٹم کے مطابق پہلے معاملے میں 4 ہندوستانی مسافر تنزانیہ سے آئے تھے۔ اُنہوں نے سونا خاص طور پر کمر بیلٹ کی جیبوں میں چھپا رکھا تھا۔ ان چاروں سے 28.17 کروڑ روپے کا کل 53 کلو سونا برآمد ہوا ہے۔ سونے کی سلاخوں کو متحدہ عرب امارات میں خصوصی طور پر ڈیزائن کردہ بیلٹ میں چھپایا گیا تھا۔

یہ بیلٹ ایک سوڈانی شہری نے دوحہ ایئرپورٹ پر ٹرانزٹ ٹائم کے دوران حوالے کی تھی۔ قطر ایئرویز کی پرواز نمبر QR-556 میں دوحہ سے آنے والے 4 ہندوستانی مسافروں کو روک لیا گیا۔ پوچھ گچھ پر معلوم ہوا کہ وہ تنزانیہ سے آرہے ہیں اور سونے کی سلاخیں ان کے جسم پر خصوصی طور پر ڈیزائن کردہ بیلٹ میں چھپائی گئی تھیں، جس کی کئی جیبیں تھیں۔

تفتیش کے دوران چاروں مسافروں نے اعتراف کیا ہے کہ انہیں دوحہ ایئرپورٹ پر سونا نامعلوم سوڈانی نے دیا تھا۔ تاہم اس مسافر نے ان کے ساتھ سفر نہیں کیا۔ چاروں مسافروں کو گرفتار کرکے عدالت میں پیش کیا گیا، جہاں سے انہیں 14 دن کے لیے عدالتی تحویل میں بھیج دیا گیا ہے۔

11 نومبر کو ہی ایک اور معاملے میں، انٹیلی جنس معلومات کی بنیاد پر، ممبئی ہوائی اڈے پر کسٹمز حکام نے 3.88 کروڑ روپے مالیت کا 8 کلو سونا ضبط کیا، تین مسافروں (ایک مرد اور دو خواتین) سے جو دبئی سے وِسٹارا کی فلائٹ سے آئے تھے۔ موم کی شکل میں سونے کا پیسٹ مسافروں کی جانب سے پہنی جانے والی جینز کی پتلون کی کمر کے قریب چھپایا گیا تھا۔

تین مسافروں میں سے ایک 60 سالہ خاتون مسافر وہیل چیئر پر تھی۔ تینوں مسافروں کو گرفتار کر کے عدالتی تحویل میں بھیج دیا گیا ہے۔ اس معاملے میں مزید تفتیش جاری ہے۔