بھارت ہندوراشٹر ہے ،تھا اور رہے گا:یوگی۔

لکھنو: وزیر اعلیٰ یوگی آدتیہ ناتھ نے کہا کہ بھارت ایک ہندوراشٹر ہے اور یہاں کا ہر شہری ہندو ہے۔ انہوں نے یہ بھی کہا کہ ہمیں یہ نہیں بھولنا چاہیے کہ ہندو کوئی مذہب یا فرقہ نہیں ہے۔ یہ ایک ثقافتی اصطلاح ہے، جو ہر شہری کے لیے موزوں ہے۔ایک ٹی وی چینل کے پروگرام میں سی ایم یوگی نے کہا کہ جب بھارت سے کوئی شخص حج پر جاتا ہے تو اسے ہندو کہہ کر مخاطب کیا جاتا ہے۔ وہ ہندو کے نام سے مشہور ہیں۔ بھارت سے وہاں جانے والے کو نہ تو مسلمان کہا جاتا ہے اور نہ ہی حاجی۔ وہاں اسے ہندو کے نام سے مخاطب کیا جاتا ہے، اس لیے وہاں کسی کو کوئی پریشانی نہیں ہے۔ اگر آپ اس تناظر میں دیکھیں تو بھارت ایک ہندو راشٹر ہے۔ یوگی نے کہا کہ کسی کو ہندو راشٹر سے پرہیز نہیں کرنا چاہیے۔ اگر آپ اسے مذہب یا فرقے سے جوڑ رہے ہیں تو اس کا مطلب ہے کہ آپ ہندو کی تعریف کو سمجھنے میں غلطی کر رہے ہیں۔ انہوں نے کہا کہ بھارت ہندو راشٹر تھا، ہے اور رہے گا۔