عتیق احمد کے دو نابالغ بیٹے، بہن، بھاوج لاپتہ، پولیس پر اٹھالینے کا الزام، اہلیہ ہائی کورٹ پہنچیں۔

مئو: جیل میں بند مافیا عتیق احمد کی اہلیہ شائستہ پروین نے امیش پال کے قتل کے بعد نابالغ بیٹوں کو پولیس کے ہاتھوں اٹھانے کے معاملے میں ہائی کورٹ سے رجوع کیا ہے۔ اس کے ساتھ ہی زینب فاطمہ، عتیق کی بہن عائشہ نوری اور بھتیجی کو بھی غیر قانونی حراست میں لینے کے لیے حبس بے جا کی درخواست دائر کی گئی ہے۔ مطالبہ کیا گیا ہے کہ ان سب کو عدالت میں پیش کیا جائے۔درخواست گزاروں کے وکلاء کی جانب سے عدالت سے کیس کی فوری سماعت کی استدعا کی گئی تاہم عدالت نے فوری سماعت سے انکار کردیا۔ عدالت نے کارروائی کے تحت آنے پر سماعت کرنے کو کہا۔درخواستوں میں کہا گیا ہے کہ عتیق کے دو نابالغ بیٹے اور اشرف کی اہلیہ زینب فاطمہ، عتیق کی بہن عائشہ نوری اور بھتیجی کو امیش پال کے قتل کے بعد پولیس اٹھا کر لے گئی ہے اور کوئی معلومات نہیں دے رہی ہے۔ جبکہ پانچ دن ہوچکے ہیں۔ پولیس اہلکار کچھ نہیں بتا رہے۔ درخواست گزار رویندر شرما، خان صولت حنیف اور شاداب علی کے وکیلوں نے کہا کہ اب اس معاملے کی سماعت ہولی کے بعد ہو سکتی ہے۔