عراق میں دردناک حادثہ: شادی کی تقریب ماتم میں تبدیل، آتشزدگی سے ۱۱۳ مرد و خواتین ہلاک، ڈیڑھ سو سے زائد زخمی۔

عراق کے صوبے نینوا میں شادی کی تقریب کے دوران ہال میں آتشزدگی سے 113 سے زائد افراد ہلاک جبکہ 150 سے زائد افراد جھلس کر زخمی ہو گئے ہیں۔

عرب میڈیا کے مطابق عراقی شہر ہمدانیہ میں شادی کی تقریب کے دوران ہال میں آتشزدگی کے وقت ایک ہزار سے زائد افراد تقریب میں شرکت کیلئے وہاں موجود تھے۔

میڈیا رپورٹس کے مطابق عراقی وزارت شہری دفاع کا کہنا ہے کہ حادثے کی ابتدائی تحقیقات کے مطابق آگ آتشبازی کے سامان سے لگی تھی، حادثے سے متعلق مزید تحقیقات جاری ہے۔

غیر ملکی میڈیا رپورٹس کے مطابق مقامی ڈپٹی گورنر نے حادثے میں 113 افراد کے ہلاکت کی تصدیق کرتے ہوئے کہا ہے کہ جائے حادثہ پر امدادی سرگرمیاں جاری ہیں، جبکہ زخمیوں کو فوری طبی امداد کیلئے اسپتال روانہ کیا جا رہا ہے تاہم حادثے میں مزید ہلاکتوں کا بھی خدشہ ہے۔