مظفر نگر میں ڈینگو کے مریضوں کی تعداد ۱۳ ہوگئی, یومیہ ۳۰۰ سے زائد وائرل بخار کے مریض اسپتال پہنچ رہے۔

مظفر نگر: عزیز الرحمن خاں.

مظفرنگر ضلع میں ڈینگی کی وباء مسلسل بڑھ رہی ہے۔ ڈینگی مچھر کے کاٹنے سے لوگ بیمار ہو رہے ہیں۔ ضلع میں ایک اور مریض ڈینگی سے متاثر پایا گیا۔ جس کے بعد اب ڈینگی کے مریضوں کی تعداد 13 ہوگئی ہے۔ اس کے علاوہ ڈسٹرکٹ ہسپتال میں ڈینگی کے مشتبہ مریض بھی داخل ہیں۔

  ڈسٹرکٹ ہسپتال میں ڈینگی کے تین مشتبہ مریض داخل ہیں۔ جن کا علاج جاری ہے۔ اس کے علاوہ وائرل بخار کے مریض بھی بڑی تعداد میں ہسپتال پہنچ کر مشورہ لے رہے ہیں۔ روزانہ تین سو سے زائد وائرل بخار کے مریض سرکاری اسپتال پہنچ رہے ہیں۔ اسپتال کی او پی ڈی کے باہر مریضوں کی لمبی قطاریں نظر آرہی ہیں۔

 ضلع ملیریا افسر الکا سنگھ نے کہا کہ ان کی ٹیم مسلسل علاقوں کا سروے کر رہی ہے۔ لوگوں کو آگاہ کیا جا رہا ہے کہ وہ اپنے گھروں میں پانی جمع نہ کریں۔ انہوں نے کہا کہ ڈینگی مچھر گھر میں ہی افزائش کرتا ہے۔ جہاں پانی میں لاروا ہوگا، مچھر وہاں پروان چڑھے گا۔ جس کے ڈنک سے لوگوں کو بخار ہو جاتا ہے۔ سی ایم او ڈاکٹر مہاویر سنگھ فوجدار کا کہنا ہے کہ بیداری کے ذریعے ہی بیماری سے بچا جا سکتا ہے۔ اپنے اردگرد صفائی کا خیال رکھیں۔ پانی جمع نہ ہونے دیں۔ ابتدائی علامات ظاہر ہوتے ہی سرکاری اسپتال پہنچ کر علاج کروائیں۔ بیماری سے بالکل لاپرواہ نہ ہوں۔