مظفر نگر میں محکمہ فوڈ سپلائی نے گھر میں رکھا ۵۰ کوئنٹل نقلی دیسی گھی پکڑا، جانوروں کی چربی کی ملاوٹ کا امکان.

مظفر نگر: عزیز الرحمن خاں۔

مظفرنگر ضلع کے روہانہ کلاں علاقہ کے گاؤں بہیدی میں واقع ایک گھر میں رکھا 50 کوئنٹل گھی ضبط کر لیا گیا۔ ایس ڈی ایم صدر اور محکمہ خوراک کی ٹیم نے چھاپہ مار کر گھی کے تین نمونے ٹیسٹ کے لیے بھجوا دئیے۔ اس کے علاوہ برآمد شدہ گھی کو ایک کمرے میں رکھ کر سیل کر دیا گیا ہے۔ تحقیقاتی رپورٹ کی بنیاد پر مزید کارروائی کی جائے گی۔ ملزم کے پاس گھی بنانے کا لائسنس نہیں تھا۔

انتظامیہ کو اطلاع ملی تھی کہ شہر کے علاقے کوتوالی کے گاؤں بہیدی میں ریاض علی کے گھر میں بغیر اجازت گھی بنایا جا رہا ہے۔ پیر کو ایس ڈی ایم صدر پرمانند جھا نے محکمہ خوراک کی ٹیم کے ذریعہ چھاپہ مارا۔ موقع پر 50 کوئنٹل گھی برآمد ہوا۔ جس کے بعد ایس ڈی ایم نے فوڈ ڈپارٹمنٹ کی ٹیم سے گھی کے نمونے لے کر جانچ کے لیے بھیج دیے۔ایس ڈی ایم پرمانند جھا نے کہا کہ انہیں اس معاملے میں شکایت ملی تھی، جس کے بعد انہوں نے علاقے کے پوسٹ انچارج سے جانچ کرائی، جس کے بعد چھاپہ مارا گیا۔ فوڈ سیفٹی افسران اشوک کمار اور انیل کمار کی قیادت میں گھی کے نمونے جانچ کے لیے بھیجے گئے ہیں۔ جس کی رپورٹ کی بنیاد پر ریاض علی کے خلاف مزید کارروائی کی جائے گی ایس ڈی ایم پرمانند جھا نے کہا کہ شکایت کی بنیاد پر یہ شبہ ہے کہ گھی میں جانوروں کی چربی کی ملاوٹ ہے۔ یہاں مختلف کمروں میں ڈرموں کے اندر گھی رکھا ہوا ملا۔ تحقیقاتی رپورٹ کی بنیاد پر ہی کچھ کہا جا سکتا ہے۔ ابھی تک چربی کی تصدیق نہیں ہوئی ہے۔ملزم ریاض حسن نے پولیس انتظامیہ کے سامنے دلیل دی کہ وہ گاؤں سے کریم جمع کر کے اس سے گھی تیار کرتا ہے۔ وہ مسلسل گھی اکٹھا کر رہا ہے، جس کے بعد وہ اسے ضلع بھر کے مختلف مقامات پر سپلائی کرتا ہے۔ اس نے کوئی ملاوٹ نہیں کی۔محکمہ خوراک کے اسسٹنٹ کمشنر ڈاکٹر چمن لال نے بتایا کہ گھی کی خوردہ فروخت کا لائسنس لیا گیا۔ محکمہ سے گھی بنانے کا لائسنس نہیں لیا گیا۔ نمونے کی ٹیسٹ رپورٹ آنے کے بعد ہی مزید کارروائی کی جائے گی۔