ورلڈ کپ فائنل: ‘فری فلسطین’ ٹی شرٹ پہنے آسٹریلوی مداح میدان میں کوہلی کے قریب پہنچ گیا، اب پولیس حراست میں، ویڈیو وائرل۔

احمدآباد: بھارت آسٹریلیا ورلڈ کپ کے فائنل میچ کے دوران پچ پر ویراٹ کوہلی کے قریب آنے والے شخص کو احمد آباد پولیس نے حراست میں لے لیا۔

اس شخص نے ‘آزاد فلسطین’ کی ٹی شرٹ پہن رکھی تھی اور اس کے ہاتھ میں جھنڈا تھا۔ وہ پچ پر ویراٹ کوہلی کے قریب آیا۔ اس نے کوہلی کے کندھے پر ہاتھ رکھا۔ کچھ دیر کے لیے میچ میں خلل پڑا اور پھر سیکیورٹی اہلکار اسے باہر لے گئے۔

پولیس کی تحویل میں لیتے وقت اس شخص نے اپنے بارے میں بتایا اور کہا کہ وہ آسٹریلیا کا رہائشی ہے۔

نیوز ایجنسی اے این آئی نے ایک ویڈیو جاری کیا ہے جس میں یہ شخص اپنا نام جانسن بتا رہا ہے۔ اس شخص کا کہنا ہے کہ ‘اس کا تعلق آسٹریلیا سے ہے اور وہ میدان میں ویراٹ کوہلی سے ملنے گیا تھا۔’

اس نے کہا کہ وہ فلسطین کا حامی ہیے۔ اس کی ٹی شرٹ پر آگے لکھا تھا

 ‘Stop Bombing Palestine’ 

اور پیچھے

 ‘Free Palestine’ 

لکھا ہوا تھا۔ یہ شخص میدان میں داخل ہوا اور ویراٹ کوہلی کے قریب آگیا۔

تصاویر میں دیکھا جا سکتا ہے کہ اس شخص نے کوہلی کے کندھے پر ہاتھ رکھا۔ اس دوران کوہلی قدرے بے چین نظر آئے، حالانکہ ان کی طرف سے کوئی ردعمل نہیں دیا گیا۔

بعد میں جب سیکورٹی اہلکار اس شخص کو لے جا رہے تھے تو ایسا لگ رہا تھا کہ وہ کوئی نعرہ لگا رہا ہے۔بعد میں اسے احمد آباد پولیس کے حوالے کر دیا گیا۔سوشل میڈیا پر کچھ لوگوں نے اس واقعے کو سیکیورٹی کی بڑی خامی قرار دیا ہے۔ غزہ میں جنگ بندی کے حوالے سے پوری دنیا میں احتجاج ہو رہا ہے اور اسرائیل پر دباؤ ڈالا جا رہا ہے کہ وہ فوری طور پر انسانی امداد کے لیے بمباری بند کرے۔

احمد آباد کے نریندر مودی سٹیڈیم میں جاری کرکٹ ورلڈ کپ کے فائنل میچ کو چند لمحوں کے لیے روکنا پڑا، کیونکہ ایک فلسطین حامی میدان میں داخل ہو گیا۔ رپورٹ کے مطابق انڈیا اور آسٹریلیا کے درمیان جاری فائنل میچ کے 14ویں اوور کے دوران ایک شخص میدان میں آ گیا اور کھیل کو کچھ دیر کے لیے روکنا پڑا۔

کرکٹ ویب سائٹ ’کرک انفو‘ کے مطابق ’ایک غیر متعلقہ شخص گراؤنڈ میں آ گیا۔ اس کے بعد چند لمحوں کے لیے میچ روک دیا گیا۔ گراؤنڈ میں داخل ہونے والے شخص نے فلسطین کے جھنڈے والا ماسک پہنا ہوا تھا اور اس کی شرٹ پر انگریزی میں ’اسٹاپ بمبنگ فلسطین‘ یعنی ’فلسطین پر بمباری بند کرو‘ کی عبارت درج تھی۔

تصاویر میں دیکھا جا سکتا ہے کہ وہ شخص انڈین کپتان وراٹ کوہلی کے بہت قریب کھڑا ہے۔ رپورٹ کے مطابق شخص نے وراٹ کوہلی کو گلے بھی لگایا۔ اس کے بعد چند ہی لمحوں میں فلسطین کے حامی تماشائی کو پولیس اور سکیورٹی اہلکار اپنی تحویل میں لے کر گراؤنڈ سے باہر لے گئے۔