مظفر نگر میں دن نکلتے ہی سڑک حادثے میں دو دوستوں کی المناک موت۔

مظفر نگر: عزیز الرحمن خاں۔

مظفر نگر میں جمعرات کی صبح ایک افسوسناک واقعہ پیش آیا۔ دہلی-پوری ہائی وے پر میراپور علاقے میں دھند کے درمیان ایک پک اپ گاڑی کی زد میں آکر بائک پر سوار دو دوستوں کی موت ہو گئی۔ بتایا گیا کہ یہ دونوں رات دیر گئے بائی پاس پر رات کا کھانا کھانے کے بعد گھر لوٹ رہے تھے۔لکڑی کے تاجر ونیت (24) ولد ورون ساکن محلہ بھوما روڈ میرا پور اپنے دوست نوین ولد راجندر ساکن مکلا پورہ کے ساتھ بائی پاس پر کھانا کھانے گیا تھا۔ دونوں موٹر سائیکل پر سوار اپنے گھر واپس جا رہے تھے۔جب وہ دہلی-پوری ہائی وے پر واقع پٹرول پمپ کے قریب پہنچے تو میرٹھ سے آنے والی ایک پک اپ گاڑی نے ان کی بائک کو سامنے سے ٹکر مار دی، حادثے میں دونوں شدید زخمی ہو گئے۔ دوسری جانب ڈرائیور پک اپ گاڑی میں موقع سے فرار ہو گیا۔ پولیس نے دونوں زخمیوں کو جانسٹھ کے سرکاری اسپتال میں داخل کرایا، جہاں ڈاکٹروں نے انہیں مردہ قرار دیا۔