عام انتخاب کے دوران پاکستان میں دھماکہ، ۵ پولیس اہلکارجاں بحق، دہشت گردوں نے کی اندھا دھند فائرنگ۔ملک بھر میں موبائل فون سروس عارضی طور پر معطل۔

خیبرپختونخواہ :پاکستان میں عام انتخابات کے درمیان جمعرات کی سہ پہر ایک بڑا دہشت گردانہ حملہ ہوا جس میں 5 پولیس اہلکاروں کی زندگیاں تلف ہوگئیںاور 2 زخمی ہوگئے۔ خیبرپختونخوا کے ضلع ڈیرہ اسماعیل خان کے کلاچی میں دہشت گردوں نے پولیس موبائل وین کو نشانہ بنایا۔ دہشت گردوں نے پہلے آئی ای ڈی دھماکہ کیا اور پھر اندھا دھند فائرنگ کی جس سے چاروں طرف چیخ و پکار مچ گئی۔

پاکستان کے خیبرپختونخواہ میں ہوئے دہشت گردانہ حملے میں 5 پولیس اہلکاروں کی جانیں تلف ہوگئیں اور 2 زخمی ہوگئے۔ حملہ آوروں نے 30 منٹ سے زیادہ وقت تک لگاتار فائرنگ کرنے سے پہلے ایک دیسی ساختہ بم نصب کر رکھا تھا۔ اس دھماکہ خیز مواد سے گاڑی کے پرخچے اڑ گئے۔ بتادیں کہ انتخابات سے ایک روز قبل بدھ کو بھی شورش زدہ صوبہ بلوچستان میں دو دھماکوں میں کم از کم 30 افراد کی موت ہوگئی تھی۔قابل ذکر ہے کہ پاکستان میں عام انتخابات کے لئے جمعرات کی صبح 8 بجے سے ووٹنگ شروع ہوئی جس میں لوگوں کی بڑی تعداد نےووٹ ڈالا۔ مانا جا رہا ہے کہ سابق وزیراعظم نواز شریف کی جماعت اس الیکشن میں سب سے بڑی پارٹی بن کر ابھر سکتی ہے، کیونکہ اس کو فوج کی حمایت حاصل ہے۔

عام انتخابات کے سلسلے میں ملک بھر میں موبائل فون سروس عارضی طور پر معطل کردی گئی ہے۔ 

ترجمان وزارت داخلہ کا کہنا ہے کہ ملک میں دہشت گردی کے حالیہ واقعات میں قیمتی جانوں کا ضیاع ہوا ہے۔

ترجمان کا کہنا ہے کہ امن و امان قائم رکھنے، ممکنہ خطرات سے نمٹنے کے لیے حفاظتی اقدامات ضروری ہیں۔کراچی، لاہور اور کوئٹہ کے مختلف علاقوں میں موبائل سروس متاثر ہے۔

بلوچستان کے تقریباً تمام اضلاع میں موبائل فون سروس متاثر ہے، موبائل و انٹرنیٹ سروس متاثر ہونے سے شہریوں کو مشکلات کا سامنا کرنا پڑ رہا ہے۔پشاور میں بھی پولنگ شروع ہونے سے پہلے موبائل سروس متاثر ہے۔پشاور کے علاقے صدر، نوتھیہ اور گلبرگ سمیت مختلف علاقوں میں موبائل فون سروس متاثر ہے۔