ہندستان فلسطین کے ساتھ، وزیر خارجہ کا اہم بیان۔ کہا فلسطینیوں کو ان کے حقوق اور وطن سے محروم رکھا گیا

ہندوستانی وزیر خارجہ ایس جے شنکر نے کہا ہے کہ اسرائیل اور فلسطین کے درمیان جاری تنازع میں جو بھی صحیح یا غلط ہو، حقیقت یہ ہے کہ فلسطینیوں کو ان کے حقوق اور وطن سے محروم رکھا گیا ہے۔

انہوں نے کہا، "7 اکتوبر کو جو ہوا وہ ‘دہشت گردانہ حملہ’ تھا، دوسری طرف، کوئی بھی معصوم شہریوں کی موت کو برداشت نہیں کرے گا۔ آپ جوابی کارروائی کا جواز پیش کر سکتے ہیں، لیکن یہ عمل کا طریقہ نہیں ہو سکتا۔ جوابی کارروائی صرف بین الاقوامی انسانی قانون کے تحت کی جانی چاہیے۔جے شنکر غزہ میں جاری اسرائیلی کارروائی کی طرف اشارہ کر رہے تھے۔ یہ تمام باتیں انہوں نے اپنے دورہ ملائیشیا کے دوران کہیں۔ ہندوستان نے ہمیشہ اسرائیل فلسطین تنازعہ کے حل کے لیے دو ملکی حل کی حمایت کی ہے۔ اس کا مطلب ہے کہ فلسطینیوں کے لیے ایک الگ خودمختار ملک ہونا چاہیے۔

جے شنکر کا یہ بیان ایسے وقت آیا ہے جب اقوام متحدہ کی سلامتی کونسل غزہ میں جنگ بندی کی قرارداد پاس کر چکی ہے۔ جس کی وجہ سے اسرائیل امریکہ سے ناراض ہے۔ مودی حکومت کی تصویر اسرائیل کے دوست کے طور پر ہے لیکن جے شنکر کا بیان اسرائیل کو سخت لگ سکتا ہے۔