آل انڈیا مسلم پرسنل لا بورڈ کے انتیسویں اجلاس عام کے سلسلہ میں بنگلور پریس کلب میں اہم پریس کانفرنس منعقد ہوئی۔

بنگلور میں منعقد ہونے والے آ ل انڈیا مسلم پرسنل لا بورڈ کے انتیسویں اجلاس عام کے سلسلے میں مجلس استقبالیہ برائے اجلاس عام کی جانب سے بنگلور پریس کلب میں ایک اہم پریس کانفرنس منعقد ہوئی، جس سے بورڈ کے جنرل سکریٹری حضرت مولانا محمد فضل الرحیم مجددی صاحب اور بورڈ کے سکریٹری حضرت مولانا محمد عمرین محفوظ رحمانی صاحب نے خطاب فرمایا۔ اس موقع پر سہ رکن کمیٹی کے ارکان مفتی افتخار احمد قاسمی، مولانا محمد مقصود عمران رشادی، سلیمان خان صاحبان خصوصی طور پر شریک تھے۔کانفرنس سے خطاب کرتے ہوئے بورڈ کے ذمہ داران نے فرمایا کہ

مسلمانان ہند کا سب سے بڑا مشترکہ اور متحدہ پلیٹ فارم ہے، یہ بورڈ 1973ء میں حیدر آباد میں قائم ہوا تھا، بورڈ کا قیام تحفظ شریعت، وحدت و اجتماعیت اور اصلاح ملت کیلئے ہوا، یہ بورڈ کو اللہ تعالیٰ کے فضل و کرم سے مسلمانان ہند کا اعتماد و اعتبار حاصل ہوا، بورڈ کے پہلے صدر حکیم اسلام حضرت قاری محمد طیب صاحب قاسمی تھے، اور بانی جنرل سکریٹری حضرت مولانا شاہ منت اللہ رحمانی اور بورڈ کے دوسرے صدر مفکر اسلام حضرت مولانا ابو الحسن علی ندوی، تیسرے صدر حضرت مولانا قاضی مجاہد الاسلام قاسمی اور چوتھے صدر حضرت مولانا رابع حسنی ندوی منتخب ہوئے، اب بورڈ کی صدارت حضرت مولانا خالد سیف اللہ رحمانی فرما رہے ہیں اور جنرل سکریٹری کی ذمہ داری مولانا محمد فضل الرحیم مجددی نبھا رہے ہیں، آل انڈیا مسلم پرسنل لا بورڈ کے مختلف شعبے، اصلاح معاشرہ کمیٹی، تفہیم شریعت کمیٹی، دارالاقضاء اور لیگل سیل اور شعبہ خواتین کارگزار اور فعال ہیں، ان دنوں مسلم پرسنل لا بورڈ تحفظ اوقاف کی مہم چلا رہا ہے، موجودہ حکومت نے وقف ترمیمی بل 2024ء کے نام سے جو بل پیش کیا ہے وہ اپنے مشمولات کے اعتبار سے نقصاندہ ہے، اسی لیے بورڈ سمیت تمام ملی تنظیموں اور جماعتوں نے اسکو مسترد کرنے کا فیصلہ کیا ہے، بورڈ کی ایک آواز پر تقریباً پونے چار کڑور ای میل جوائن پارلیمانی کمیٹی کو بھیجے گئے، جن کے ذریعے یہ بات واضح ہوگئی کہ مسلمانان ہند کو یہ وقف ترمیمی بل کسی بھی قیمت پر منظور نہیں ہے۔

آل انڈیا مسلم پرسنل لا بورڈ ملک کے مختلف حصوں میں اجلاس عام بھی منعقد کرتا ہے، اب تک بورڈ کے اٹھائیس اجلاس ہوچکے ہیں، جن میں بڑے اہم فیصلہ لئے گئے، جن میں ملک و ملت کی رہنمائی کی گئی، بورڈ کا انتیسواں اجلاس عام 23- 24 نومبر 2024ء بروز سنیچر و اتوار کو صوبہ کرناٹک کے عظیم ترین دینی درسگاہ دارالعلوم سبیل الرشاد میں منعقد کیا جارہا ہے، ان دو دنوں میں بورڈ کے ارکان اور مدعوں خصوصی کی مختلف مشاورتی نشستیں ہوگی جن میں بورڈ کی مختلف کمیٹیوں کی رپورٹ بھی پیش ہوگی، اور آئندہ کا لائحہ عمل بھی طے کیا جائے گا، خاص طریقہ پر تحفظ اوقاف کے سلسلے میں حکمت عملی پر غور و خوص ہوگا، چونکہ یہ اجلاس انتخابی اجلاس بھی ہے، اس لئے اس میں نئے ارکان کا انتخاب بھی ہوگا اور فوت شدہ ارکان کی خالی جگہ پر کیا جائے گا، ان شاء اللہ۔

آل انڈیا مسلم پرسنل لا بورڈ کے انتیسویں اجلاس عام کے موقع پر عیدگاہ قدوس صاحب میں ایک عظیم الشان جلسہ بھی منعقد ہوگا، جس کا عنوان تحفظ شریعت و تحفظ اوقاف مقرر کیا گیا ہے، اس باوقار اجلاس میں بورڈ کے عہدیداروں ملت کی ممتاز شخصیت اور مختلف مسالک و مکاتب فکر کے ذمہ داران اور سربراھان کا خطاب ہوگا، اور ملت کو حوصلہ بخش پیغام بھی دیا جائے گا ان شاء اللہ، اندازہ ہیکہ اس اجلاس عام میں شہر گلستان بنگلور اور ریاست کرناٹک کے مختلف حصوں سے کئی لاکھ مسلمان شریک ہوکر اپنے قائدین سے استفادہ کریں گے، نیز اس اجلاس سے ملک و ملت کو اور حکومت کو مسلم پرسنل لا سے جڑے ہوئے مسائل کے سلسلے میں متوجہ کیا جائے گا، اور امید ہیکہ اس کے بہترین اثرات ظاہر ہونگے، باذن اللہ۔

بنگلور کے تمام مسلمانوں سے خصوصاً اور ریاست بھر کے مسلمانوں سے گزارش ہیکہ اس اجلاس میں شریک ہوکر اپنی غیرت ایمانی اور حمیت دینی کا ثبوت دیں۔