مہاتما گاندھی کو گالی دینے والا کالی چرن مہاراج گرفتار، رائے پور کی مقامی عدالت میں کیا جائیگا پیش۔

مہاتما گاندھی کو گالی دینے والا کالی چرن مہاراج گرفتار، رائے پور کی مقامی عدالت میں کیا جائیگا پیش۔

رائے پور: چھتیس گڑھ کے رائے پور کی دھرم سنسد میں مہاتما گاندھی کو گالی دینے والے کالی چرن مہاراج کو آج علی الصبح رائے پور پولیس نے گرفتار کر لیا۔ کالی چرن کو مدھیہ پردیش سے گرفتار کیا گیا ہے۔

رائے پور کے ایس پی پرشانت اگروال کے مطابق، “کالی چرن کو صبح 4 بجے باگیشور دھام کے قریب ایک شخص کے گھر سے گرفتار کیا گیا۔ اس نے قریب ہی ایک لاج بھی بک کروایا تھا۔"

ابتدائی تفتیش کے بعد پولیس نے کالی چرن مہاراج کے خلاف بغاوت کی دفعات بھی شامل کی ہیں۔ پرشانت اگروال کے مطابق پولس ٹیم کالی چرن کے ساتھ رائے پور کے لیے روانہ ہوگئی ہے۔ اسے رائے پور کی مقامی عدالت میں پیش کیا جائے گا۔

پولیس کے مطابق کالی چرن مہاراج کی گرفتاری کے لیے تین ٹیمیں مختلف ریاستوں میں بھیجی گئیں تھی۔

رائے پور 'دھرم سنسد' کا ایک ویڈیو وائرل ہوا جس میں اکولا کے کالی چرن مہاراج اسٹیج پر مہاتما گاندھی کو گالی دیتے ہوئے نظر آئے۔

ویڈیو میں دیکھا جا سکتا ہے کہ کالی چرن مہاراج مہاتما گاندھی کے لیے نازیبا الفاظ استعمال کر رہے ہیں اور ناتھو رام گوڈسے کی تعریف کر رہے ہیں، جس نے انھیں قتل کیا تھا۔

پولیس نے رائے پور میونسپل کارپوریشن کے اسپیکر اور کانگریس لیڈر پرمود دوبے کی شکایت پر کالی چرن کے خلاف ایف آئی آر درج کی تھی جس کے بعد یہ گرفتاری عمل میں آئی ہے۔ اس معاملے میں چھتیس گڑھ کے وزیر اعلی بھوپیش بگھیل نے کہا تھا گاندھی جی کی توہین کرنے والوں کے خلاف سخت کارروائی کی جائے گی۔

خبر رساں ایجنسی اے این آئی سے بات کرتے ہوئے انہوں نے کہا تھا، "یہاں اشتعال انگیز اور پرتشدد باتوں کو برداشت نہیں کیا جاتا، بابائے قوم کے بارے میں ایسی باتیں کرنا یقیناً ظاہر کرتا ہے کہ ان کی ذہنی حالت کیا ہے۔ اس کی جتنی بھی مذمت کی جائے کم ہے، چاہے جتنے بھی سخت قدم اٹھائے جائیں۔ لیا جائے، لے جایا جائے گا۔"

DT Network