بی ایچ یو: افطار پارٹی پر ہنگامہ، وائس چانسلر کا پتلا نذر آتش۔
وارانسی :(ایجنسی) بنارس ہندو یونیورسٹی (بی ایچ یو) میں افطار پارٹی کے انعقاد کو لے کر بدھ کی شام ہنگامہ ہوگیا تھا۔ یونیورسٹی کے کیمپس میں واقع مہیلا مہاودیالیہ میں طلباء اور اساتذہ کی جانب سے افطار پارٹی کا اہتمام کیا گیا تھا۔ لیکن کچھ طلباء نے اسے نئی روایت قرار دیتے ہوئے احتجاج کیا ہے۔
ستیہ ہندی کے مطابق اس کے بعد طلباء کے ایک گروپ نے یونیورسٹی کے وائس چانسلر پروفیسر سدھیر کمار جین کا ان کی رہائش گاہ کے باہر پتلا نذر آتش کیا۔
وائس چانسلر کا پتلا جلانے والے طالب علم شبھم کا کہنا ہے کہ وائس چانسلر طلبہ کے معاملے پر مکمل طور پر الگ ہوجاتے ہیں، جبکہ ان کے پاس افطار پارٹی کے لیے کافی وقت ہے۔ انہوں نے کہا کہ یونیورسٹی کی روایت سے ہٹ کر افطار پارٹی کا اہتمام کیا گیا ہے۔ انہوں نے وائس چانسلر کو ہندو مخالف قرار دیا۔
جبکہ آشیرواد نامی طالب علم نے بتایا کہ وہ گزشتہ 5 سال سے یونیورسٹی میں ہیں اور یہاں کبھی افطار پارٹی کا اہتمام نہیں کیا گیا۔ انہوں نے کہا کہ یہ خوشامد کی کارروائی ہے۔
وہیں بی ایچ یو کے ترجمان ڈاکٹر راجیش سنگھ نے بتایا کہ مہیلا مہاودیالیہ میں ہر سال رمضان کے مہینے میں افطار پارٹی کا اہتمام کیا جاتا ہے اور اس میں وائس چانسلر اور رجسٹرار شرکت کرتے رہے ہیں۔ انہوں نے کہا کہ کسی بھی قسم کی نئی روایت کا الزام لگانا سراسر غلط ہے۔
افطار پارٹی میں شریک وائس چانسلر کی کچھ تصویریں منظر عام پر آئی تھیں اور طلباء کے ایک گروپ نے ان کے خلاف احتجاج شروع کر دیا تھا۔
ماضی میں رام نومی کے جلوس کے موقع پر کئی ریاستوں میں تشدد، اذان تنازع اور ہنومان چالیسا کے بعد بی ایچ یو میں افطار پارٹی کے انعقاد کو لے کر یہ نیا تنازع کھڑا ہوتا نظر آرہا ہے۔
0 Comments