ہندوستانی فوج کی توہین کا الزام، بالی ووڈ اداکارہ ریچا چڈھا نے معافی مانگی۔

ممبئی: بالی ووڈ اداکارہ ریچا چڈھا  شمالی فوج کے کمانڈر لیفٹیننٹ جنرل اوپیندر دویدی کے اس بیان کے جواب میں ایک ٹویٹ پر تنقید کی زد میں آگئیں کہ ہندوستانی فوج پاکستان کے زیر قبضہ کشمیر کو واپس لینے جیسے احکامات پر عمل درآمد کے لیے تیار ہے۔ ریچا نے اپنے ردعمل سے تنازعہ کھڑا کر دیا ہے اور ان پر فوج کی توہین کا الزام لگایا گیا ہے۔بی جے پی کے منجندر سنگھ سرسا نے ٹویٹ کیا کہ ’یہ شرمناک ٹویٹ ہے! جلد از جلد واپس لیا جائے۔ ہماری مسلح افواج کی توہین جائز نہیں ہے‘۔ شمالی فوج کے کمانڈر لیفٹیننٹ جنرل اوپیندر دویدی کا منگل کو یہ بیان وزیر دفاع راج ناتھ سنگھ کے پہلے بیان کے تناظر میں آیا ہے کہ ہندوستان کا مقصد پاکستان کے زیر قبضہ کشمیر پر دوبارہ دعویٰ کرنا ہے۔ اس بیان پر تبصرہ کرتے ہوئے لیفٹیننٹ جنرل اوپیندر دویدی نے کہا کہ فوج ہمیشہ حکومت کے احکامات پر عمل درآمد کے لیے تیار ہے۔فوکرے اداکارہ نے دویدی کے تبصروں پر ایک پوسٹ شیئر کرتے ہوئے ’گلوان سیز ہائی‘ (Galwan Says Hi) ٹویٹ کیا۔ اس کے جواب میں 2020 کے گالوان جھڑپ کا حوالہ دیا گیا، جس میں ہندوستانی فوج کے 20 فوجی شہید ہوئے جب کہ چین کی پیپلز لبریشن آرمی (PLA) نے تقریباً 35 تا 40 فوجیوں کو کھو دیا۔ اداکارہ کو ان کے ٹویٹ پر کافی تنقید کا نشانہ بنایا جا رہا ہے۔ ہندوستانی فوج کا مذاق اڑانے اور ہندوستان اور چین کے درمیان 2020 کے گلوان تصادم میں جوانوں کی قربانی کو حقیر قرار دینے پر نیٹیزنز نے اداکارہ کو تنقید کا نشانہ بنایا۔اداکارہ نے بعد میں کی گئی ایک ٹویٹ میں تنقید کا حوالہ دیتے ہوئے کہا کہ انہیں ایک ’کال‘ موصول ہوئی تھی اور اس وقت تک انہیں سوشل میڈیا کے ردعمل کے بارے میں کوئی اندازہ نہیں تھا۔ یہ بات قابل ذکر ہے کہ ریچا نے اپنے کیریئر کا آغاز دیباکر بنرجی کی اوئے لکی لکی اوئے سے کیا۔ اس کے بعد پیچھے مڑنے کی نوبت نہ آئی۔