ہر قسم کی تبدیلی مذہب غیر قانونی نہیں کہی جاسکتی: سپریم کورٹ۔

نئی دہلی: ایک اہم تبصرے میں منگل کو ایک معاملے کی سماعت پر رضامندی ظاہر کرتے ہوئے سپریم کورٹ نے کہا کہ ہر قسم کی تبدیلی مذہب کو غیر قانونی نہیں کہا جا سکتا۔

خبر رساں ایجنسی پی ٹی آئی کے مطابق عدالت نے مدھیہ پردیش حکومت کی جانب سے ضلع مجسٹریٹ کو بتائے بغیر شادی کرنے والے بین المذاہب جوڑوں کے خلاف قانونی چارہ جوئی کو روکنے کے ہائی کورٹ کے حکم کو چیلنج کرنے والی درخواست پر سماعت کرنے پر اتفاق کیا۔

عدالت نے کہا کہ ہر قسم کی تبدیلی مذہب کو غیر قانونی نہیں کہا جا سکتا۔جسٹس ایم آر شاہ اور جسٹس سی ٹی روی کمار نے اس معاملے میں نوٹس جاری کیا اور معاملہ کی سماعت 7 فروری کو مقرر کی۔

سالیسٹر جنرل تشار مہتا نے ہائی کورٹ کے حکم پر روک لگانے کی درخواست کی لیکن عدالت عظمیٰ نے کوئی بھی ہدایت دینے سے انکار کردیا۔مہتا نے کہا کہ شادی کو غیر قانونی تبدیلی کے لیے استعمال کیا جاتا ہے اور "ہم اس سے آنکھیں بند نہیں کر سکتے”۔

ہائی کورٹ نے ایک عبوری حکم میں ریاستی حکومت کو ہدایت دی کہ MP  مذہبی آزادی ایکٹ  (MPFRA)  کی دفعہ 10 کے تحت وہ بالغ افراد کے خلاف قانونی کارروائی نہ کرے جو اپنی مرضی سے شادی کرتے ہیں۔ ہائی کورٹ نے 14 نومبر کو کہا کہ سیکشن 10، جو مذہب تبدیل کرنے کے خواہشمند شہری کے لیے ضلع مجسٹریٹ کو (پہلے) اعلامیہ دینا لازمی بناتا ہے، "ہماری رائے میں اس عدالت کے مذکورہ فیصلوں کے پیش نظر غیر آئینی ہے”۔ 

ہائی کورٹ کی عبوری ہدایت MPFRA 2021 کی دفعات کو چیلنج کرنے والی سات درخواستوں پر آئی۔ درخواست گزاروں نے ریاست کو ایکٹ کے تحت کسی کے خلاف مقدمہ چلانے سے روکنے کے لیے عبوری ریلیف کی درخواست کی تھی۔

عدالت نے ریاستی حکومت کو درخواستوں پر اپنا ترتیب وار جواب داخل کرنے کے لیے تین ہفتے کا وقت دیا تھا اور کہا تھا کہ درخواست گزار اس کے بعد 21 دن کے اندر اپنا جواب داخل کر سکتے ہیں۔