مولانا سید سلمان ندوی کے بیان کے بعد جلسہ میں ہنگامہ، ادارہ کے مہتمم مفتی قاسمی نے واقعہ کوبتایا انتہائی افسوسناک۔

مظفر نگر/دیوبند: سمیر چودھری۔

ممتاز عالم دین مولانا سید سلمان ندوی کے ذریعہ مدرسہ کے سالانہ پروگرام کے دوران عالمی شہرت یافتہ دینی ادارہ دارالعلوم دیوبند اور جمعیة علماءہند کے متعلق دیئے گئے بیان کے بعد تنازعہ کھڑا ہوگیا،جس کے بعد مدرسہ کے مہتمم نے اس پورے واقعہ پر سخت افسوس کااظہار کرتے ہوئے اس کی تردیدی کی اور کہاکہ ہمیں توقع نہیں تھیں کہ مولانا سلمان ندوی اس طرح کا بیان دینگے، انہوں نے کہاکہ ہم دارالعلوم دیوبند کے نمائندے ہیں اور دارالعلوم دیوبند جیسے عظیم ادارے یا جمعیت علماءہند جیسی موقر تنظیم کے سلسلہ میں غلط بیانی ناقابل برداشت ہے۔

واضح رہے کہ جمعرات کے روز علاقہ کے قدیم دینی ادارہ دارالعلوم حسینیہ تاولی کا سالانہ پروگرام تھا،جس میں نامور علماءکرام شریک تھے، جس میں معروف عالم دین مولانا سلمان ندوی بھی شامل ہوئے،مدرسہ مہتمم کے مطابق دعوت دینے کے بعد مولانا سلمان ندوی کو جلسہ میں شرکت کرنے سے منع کردیاگیا تھا لیکن اس کے باوجود وہ جلسہ میں آگئے، جس کے بعد مولانا سے صرف تعلیمی بیداری کے متعلق گفتگو کرنے کو کہاگیاہے، تحریری طور پر بھی ان سے تعلیم کی اہمیت پر ہی بیان کرنے کی درخواست دی گئی تھی،لیکن تعلیم کی اہمیت کو بیان کرتے ہوئے اچانک مولانا ندوی اپنی رو میں بہہ گئے اور انہوں نے دارالعلوم دیوبند، جمعیة علماءہند غرض کہ دیگر دینی اداروں کی کارکردگی کو اپنی زد میں لے لیا اور ان پر خاک ڈالنے یا لعنت بھیجنے جیسے الفاظ کا استعمال کرڈالا ،جس کے بعد جمعیة علماءمظفرنگر کے ذمہ داران نے موقع پر ہی اس کی سخت مخالفت کرتے ہوئے مولانا کے بیان پر اعتراض کیا ،جس کے سبب ایک ہنگائی صورتحال پیدا ہوگئی اور ذمہ داران نے بمشکل ڈیمیج کنٹرول کی کوشش لیکن پورے واقعہ کی ویڈیو سوشل میڈیا پر وائرل ہوگئی ۔ جس کو لیکر مختلف قسم کے تبصرے سامنے آرہے ہیں، ایک جانب جہاں مولانا سلمان ندوی کے بیان سے سخت اختلاف کیا جارہاہے وہیں کئی لوگوں مولانا سلمان کے بیان کو درست ٹھہرارہے ہیں۔ 

اس سلسلہ میں مدرسہ کے مہتمم مولانا عبدالصمد قاسمی نے اسے انتہائی افسوسناک واقعہ قرار دیا اور کہاکہ ہم اس کی سخت تردید کرتے ہیں۔انہوں نے کہاکہ جلسے میں جو کچھ ہوا ہے۔وہ بہت برا ہوا ہے ۔پریس کو جاری بیان میں مہتمم مفتی عبدالصمد قاسمی نے کہا ہم لوگوں نے مولانا سلمان ندوی کو اجلاس میں آنے کے لئے منع کردیا تھا۔وہ آگئے تو ان کو شرائط کے ساتھ تقریر کرنے کی اجازت دے دی گئی تھی۔لیکن انہوں نے جس طرح دارالعلوم دیوبند اور جمعیة علماءہند کے بارے میں غلط بیانی سے کام لیا وہ افسوس ناک ہے ،یہ ہمیں تلخ تجربہ ہوا ہے۔ ہماری کوشش ہوگی کہ آئندہ کبھی اس طرح کا واقعہ پیش نہ آئے۔واضح رہے کہ ضلع مظفرنگر میں واقع دارالعلوم حسینیہ تاولی قدیم اور نہایت ممتاز و مقبول ترین تعلیمی ادارہ ہے، جس کی بنیادملک کی آزادی کے چندسال بعدہی بزرگوں ہاتھوں رکھی گئی تھی آج اس ادارے کو75 سال ہوگئے ہیں، یہ ادارہ اپنے علاقہ کے ساتھ ساتھ ملک بھر کے طلبہ کی علمی تشنگی کو سیراب کررہا ہے۔