دو ہزار کے نوٹ بند ہوں گے، نوٹ بندی پارٹ ٹو: ریزرو بینک نے عوام کو ستمبر تک بدلنے کی مہلت دی۔

 نئی دہلی: کالا دھن روکنے کے لیے ۲۰۱۶ میں یکبارگی پانچ سو اور ہزار کے نوٹ بند کرنے کے بعد ۲ ہزار کی نوٹ لائی گئی تھی اب ریزروبینک آف انڈیا (آر بی آئی) نے دوہزار روپے کے سبھی نوٹ واپس لینے کا فیصلہ کیا ہے۔ اس سلسلے میں آر بی آئی نے سبھی بینکوں کو مشورہ دیا ہے کہ وہ فوری اثر سے دوہزار روپے روپے کے نوٹ جاری کرنا بند کر دیں۔ حالانکہ فی الحال دوہزار روپے روپے کے نوٹ ’ناجائز کرنسی‘ نہیں ہیں اور اس کا استعمال کیا جا سکتا ہے، لیکن آر بی آئی نے بتایا ہے کہ 30 ستمبر تک ہی یہ نوٹ جائز کرنسی کی شکل میں سرکولیشن میں رہیں گے۔ گویا کہ جن لوگوں کے پاس ابھی دوہزار روپے روپے کا نوٹ ہے، انھیں بینک سے 30 ستمبر تک ایکسچینج کرنا ہوگا۔

قابل ذکر بات یہ ہے کہ آپ بینک سے دوہزار روپے کے نوٹ پر مشتمل بڑی رقم ایک ساتھ ایکسچینج بھی نہیں کر پائیں گے۔ آر بی آئی کا کہنا ہے کہ آپ 23 مئی سے ایک بار میں 20 ہزار روپے تک کے ہی دوہزار روپے کے نوٹ بدل یا جمع کر سکتے ہیں۔ اس کے لیے بینکوں کو اسپیشل وِنڈو کھولنا ہوگا۔ اس کے علاوہ آر بی آئی نوٹ بدلنے اور جمع کرنے کے لیے 19 برانچ کھولے گا۔آر بی آئی نے ایک پریس ریلیز میں بتایا ہے کہ 19-2018 میں ہی 2000 روپے کا نوٹ چھاپنا بند کر دیا تھا۔ دلچسپ بات یہ ہے کہ 2000 روپے کے نئے نوٹ بازار میں آئے ہوئے ابھی بہت زیادہ دن بھی نہیں ہوئے ہیں۔ نومبر 2016 میں نوٹ بندی کے بعد 2000 روپے کے نئے نوٹ بازار میں آئے تھے۔ نوٹ بندی کے وقت 500 اور 1000 روپے کے نوٹ کو بند کر دیا گیا تھا اور کہا گیا تھا کہ یہ قدم بدعنوانی کو ختم کرنے اور چھپ رہے جعلی نوٹ پر لگام لگانے کے لیے اٹھایا گیا ہے۔