مظفر نگر میں بورویل میں گرنے سے مزدور کی موت، بھائی نے سخت جدو جہد کے بعد نکالا۔

مظفر نگر: عزیز الرحمن خاں۔

 مظفر نگر میں بورویل میں پھسل کر گرنے سے ایک مزدور کی موت ہو گئی۔ اس سے پہلے اس کے بھائی نے جلدی میں گڑھے میں گرنے والے مزدور کو باہر نکالا۔ جب اسے تشویشناک حالت میں ضلع اسپتال لے جایا گیا تو مزدور راستے میں ہی دم توڑ گیا۔ گھر کی تعمیر کے لیے ایک ستون کھڑا کرنے کے لیے مشین سے گہرا گڑھا کھودا گیا تھا۔

مظفر نگر کے چرتھول تھانہ علاقے کے داڈھیرو گاؤں محبوب کے مکان کی تعمیر کا کام چل رہا ہے رہا ہے۔ جس پلاٹ پر گھر بنایا جا رہا ہے اس کے ساتھ ہی ایک گہرا تالاب ہے۔ ایک مضبوط اور گہری بنیاد تیار کرنے کے لیے تالاب کی سطح پر ستون لگائے جا رہے ہیں۔ ستون کو گہرائی میں کھڑا کرنے کے لیے مشین سے تقریباً 100 سینٹی میٹر کے دائرے میں 15 فٹ گہرا گڑھا کھودا گیا۔

22 سالہ مزدور آدیش ولد پریم ساکن گاؤں تیوڑا تھانہ ککرولی جو گھر کی تعمیر میں مصروف تھا، پیر کے روز اچانک پھسل کر بورویل میں گر گیا۔ مزدور کو گڑھے میں گرتے دیکھ کر وہاں کام کرنے والے دوسرے مزدوروں نے خطرے کی گھنٹی بجا دی۔  

عینی شاہدین کے مطابق آدیش کا بھائی سریش بھی مکان کی تعمیر میں مزدوری کرتا تھا۔ لوگوں نے اس کے ذریعے آدیش کو بچانے کا کام شروع کیا۔ آدیش کے بھائی کےپیر میں رسی باندھ کر بورویل میں اتار دیا گیا۔ جس کے بعد اسکو کو باہر نکال کر ضلع اسپتال لے جایا گیا۔ اسپتال میں ڈاکٹروں نے آدیش کو مردہ قرار دے دیا ہے۔