شاملی میں چھاپہ مارنے آئے محکمہ بجلی کے ملازمین پر گھر میں رکھے پانچ لاکھ روپے چوری کرنے کا الزام۔

مظفرنگر: عزیز الرحمن خاں۔

شاملی کے قصبہ اون میں محکمہ بجلی کی ٹیم نے چھاپہ مارا اور بجلی چوری کے الزام میں ایک خاندان کے خلاف رپورٹ درج کرائی گئی تو دوسری جانب خاندان کی خواتین نے بجلی کی ٹیم پر گھر میں رکھے پانچ لاکھ روپے چوری کرنے کا الزام عائد کیا۔ خواتین نے پولیس چوکی میں شکایت درج کرکے کارروائی کا مطالبہ بھی کیا ہے۔

قصبہ میں محکمہ بجلی کی ویجیلنس ٹیم کی طرف سے چیکنگ مہم چلائی گئی۔

ٹیم نے موگتی میں واقع ریتا زوجہ اشوک گوئل کے گھر پر چھاپہ مارا۔ بجلی محکمہ کی ٹیم میں ڈرائیور کے طور پر تعینات خواتین کو دھکے دے کر اور گالی گلوچ کرتا ہوا گھر میں داخل ہوا۔ انہوں نے بجلی چوری کی ویڈیو بنائی اور گھر میں رکھے تقریباً پانچ لاکھ روپے کی نقدی بھی لے گئے۔خاتون ریتا زوجہ اشوک گوئل، سادھنا زوجہ سشیل نے پولیس چوکی میں شکایت درج کراتے ہوئے ملزم ملازمین کے خلاف کارروائی کا مطالبہ کیا۔ چوکی انچارج سچن کمار تیاگی موقع پر گئے اور جانچ کے لیے سی سی ٹی وی فوٹیج حاصل کی۔

دوسری جانب محکمہ بجلی کی ٹیم کے انچارج انسپکٹر ہرپال سنگھ نے کہا کہ تمام الزامات بے بنیاد ہیں۔ شکایت کنندہ کے ذریعہ بجلی چوری کی جارہی تھی جس میں 11 کلو واٹ بجلی چوری پکڑی گئی اور مقدمہ درج کرلیا گیا ہے۔