اسرائیل کا زبردست جانی ومالی نقصان، حماس کے حملوں میں ۲۲ سے زائد ٹینک اور فوجی گاڑیاں تباہ، ۳۰ صہیونی ہلاک وزخمی، غزہ میں جارحیت جاری۔

غزہ: جمعرات کو غزہ کی پٹی پر اسرائیلی فوج کی بربریت اور جارحیت کو ۶۹ دن ہوگئے، جمعرات کے دن بھی صہیونی فوج نے غزہ کی پٹی پر جاری بربریت میں مختلف مقامات پر وحشیانہ بمباری کی جس کے نتیجے میں گھروں کے اندر موجود شہریوں کے سروں پر ان کے مکانات کو گرا دیا گیا جس کے نتیجے میں دسیوں فلسطینی شہید اور زخمی ہوگئے۔ اسرائیلی فوج کی طرف سے اجتماعی قتل عام اور ننگی جارحیت کے جرائم کی وجہ سے غزہ میں انسانی المیہ رونما ہوچکا ہے اور قابض فوج ایک ایک گھر میں گھس کر وہاں موجود لوگوں کا قتل عام کررہی ہے۔ دوسری جانب فلسطینی مزاحمتی فورسز قابض دشمن فوج کے خلاف پوری قوت سے مزاحمت جاری رکھی ہوئے ہیں اور متعدد مقامات پر دشمن فوج کو زخم چاٹنے پرمجبور کیا گیا ہے۔جنین میں جھڑپیں جاری ہیں۔دعویٰ کیاجارہا ہے کہ جمعرات کو صبح سے۱۱ بجے دن تک ۳۰ سے زائد اسرائیلی فوجی ہلاک وزخمی اور درجنوں گاڑیاں تباہ ہوئی ہیں۔ الجزیرہ چینل کی رپورٹ کے مطابق جمعرات کو القسام بریگیڈ نے اعلان کیا کہ اس کے مجاہدین شجاعیہ کے علاقے میں "حسنین روڈ" پر طاقتور بموں سے صہیونی فوج کی پیادہ فوج کو نشانہ بنانے میں کامیاب ہو گئے ہیں۔ القسام نے بتایا کہ اس حملے میں غاصب صیہونی حکومت کے کم از کم۱۰ فوجی ہلاک ہوگئے۔علاوہ ازیں، القسام کے مجاہدین نے غزہ شہر کے علاقے شیخ رضوان میں صیہونی حکومت کے ۴ مرکاوا ٹینکوں اور ۴ بکتر بند گاڑیوں کو یاسین  میزائل سے نشانہ بنایا۔القسام نے یہ بھی اعلان کیا کہ اس کے جانبازوں نے صیہونی حکومت کے ایک اور مرکاوا ٹینک کو غزہ شہر کے مشرق میں واقع الزیتون کے علاقے میں نشانہ بنایاہے۔ اس ٹینک کو بھی یاسین ۱۰۵ سے نشانہ بنایا گیا۔ٹیلی گرام چینل پر القسام کی رپورٹ کے مطابق اس کے جانبازوں نے غزہ شہر کے مشرق میں الشجاعیہ محلے میں بھی ایک ٹینک کو  نشانہ بنایا۔حماس نے لکھا کہ شیخ رضوان میں جنگ سے واپسی کے بعدمجاہدین نے اطلاع دی کہ انہوں نے ایک صیہونی فورس کو نشانہ بنایا جس نے اپنے آپ کو ایک عمارت کے اندر بند کر رکھا تھا۔ وہیں القسام نے میزائلوں سے خان یونس شہر کے شمال میں چار فوجی گاڑیوں اور دو صہیونی مرکاوا ٹینکوں کو نشانہ بنانے میں کامیاب ہوئے۔خان یونس شہر کے جنوب مشرق میں دو صہیونی مرکاوا ٹینکوں کو بھی نشانہ بنایا، فوجی مقام پر دشمن کے ٹھکانوں پر بھی میزائل سے بمباری کی، خان یونس شہر میں تین مزیدمرکاوا ٹینکوں کو نشانہ بنانے میں کامیاب ہوئے۔القسام بریگیڈ اور القدس بریگیڈ کے مجاہدین نے خان یونس شہر کے مشرقی محور میں گھسنے والی فورسز کے ایک اجتماع کو بھاری صلاحیت کے مارٹر گولوں سے تباہ کر دیا۔مجاہدین نے تصدیق کی کہ انہوں نے قابض فوج کو براہ راست جانی نقصان پہنچایا ہے۔ خان یونس شہر کے مشرقی اور شمالی محوروں میں گھسنے والے دشمن کے مراکز کو بھاری صلاحیت کے مارٹر گولوں سے تباہ کر دیا۔القسام کے مجاہدین خان یونس شہر میں دو مزید مرکاوا ٹینکوں کو نشانہ بنانے میں کامیاب ہو گئے۔خان یونس شہر میں ایک صہیونی ٹینک کو ال یاسین گولے سے تباہ کر کے اسے آگ لگا دی گئی۔غزہ شہر کے جنوبی محور میں دشمن کے فیلڈ کمانڈ رومز کو مختصر فاصلے تک مار کرنے والے رجوم میزائل سے نشانہ بنایا۔ادھر فلسطین کی جہاد اسلامی تحریک کے فوجی بازو القدس بریگیڈ نے بھی اس کے جاں بازوں اور غاصب اسرائیلی فوجیوں کے درمیان آج صبح غزہ کے مشرق میں الزیتون اور شجاعیہ محور اور مغرب میں شیخ رضوان کے علاقے میں شدید جھڑپوں کی خبر دی ہے۔سرایا القدس نے کہا کہ ہم نے جبالیہ اور بیت لاہیہ کے محاذوں پر ایک صہیونی ٹینک اور ایک ٹی ڈی نائن بلڈوزر کو نشانہ بنایا۔ الزیتون کے مشرق میں دشمن کے فوجی مراکز پر بھاری صلاحیت کے مارٹر گولوں سے بمباری کی۔سرایا القدس نے کہا کہ کل شام سے ہم نے غزہ کے مشرق میں واقع الشجاعیہ محلے میں التقدم محور میں چار صہیونی ٹینکوں اور ایک فوجی گاڑیوں کو نشانہ بنایا ہے۔خدا کا شکر ہے کہ ہم غزہ شہر کے مغرب میں واقع شیخ رضوان کے محلے میں ایک صہیونی فوجی کو نشانہ بنانے میں کامیاب ہوئے۔ ہم نے وسطی گورنریٹ کے مشرق میں واقع تامین توتاہ ہل کے آس پاس کے فوجی مراکز پر مارٹر گولوں سے بمباری کی۔ہم نے غزہ کے مشرق میں الزیتون محلے میں التقدم محور میں ایک صہیونی فوجی بردار جہاز اور مرکاوا ٹینک کو نشانہ بنایا۔خان یونس کے مشرق میں تقدم محور میں الظلال مسجد کے ارد گرد فوجی مراکز پر بمباری کی۔قبل ازیں اسرائیلی فوج نے بدھ کو اعتراف کیا تھا کہ گزشتہ چوبیس گھنٹے کے دوران غزہ میں ۱۰ اسرائیلی فوجی ہلاک اور ۶  زخمی ہوئے ہیں۔جبکہ حماس نے دعویٰ کیاتھا کہ بدھ کو کم از کم شجاعیہ میں ۱۵ ہلاک اور درجنوں فوجی زخمی ہوئے تھے۔ دریں اثناء  اس وقت غزہ کی پٹی میں خان یونس لڑائی کا مرکز ہے جہاں اسرائیلی فوج کی توپ خانے سے گولہ باری کے  نتیجے میں مزید متعدد شہری شہید ہو گئے۔ کمال عدوان ہسپتال کے شعبہ اطفال کی طرف سے جاری ایک بیان میں کہا گیا ہے کہ اسرائیلی بمباری اور ناکہ بندی کی وجہ سے ہسپتال میں موجود مزید دو زخمی بچے دم توڑ گئے۔ غزہ میں فلسطینی وزارت صحت کے ترجمان ڈاکٹر اشرف القدرہ نے بتایا کہ اسرائیلی فوج نے کمال عدوان میں لائے گئے دس زخمیوں کو طبی امداد فراہم کرنے سے روک دیا جس کے نتیجے میں زخموں سے تڑپتے دو بچے دم توڑ گئے۔ اسرائیلی فوج نے طبی عملے کو زخمیوں اور بیماریوں کو طبی سہولیات کی فراہمی سے روکنے کے لیے ہسپتال کے ایمرجنسی وارڈ پر چھاپہ مارا جس کے نتیجے میں دو شہری شہید ہوگئے۔ انہوں نے بتایا کہ اسرائیلی فوج نے طبی عملے کو تمام زخمیوں اور انتہائی نگہداشت میں زیر علاج بچوں کو ہسپتال کی دوسری منزل پر جمع کرنے کا حکم دیا اور ہسپتال کے تمام حصوں کی بجلی، پانی اور خوراک کاٹ دی۔   ادھر اسرائیلی فوج نے کمال عدوان ہسپتال کےڈائریکٹر سمیت طبی عملے کے ۷۰کارکنوں اور ڈاکٹروں کو یرغمال بنا رکھا ہے۔اس وقت ہسپتال کے احاطے میں 2500 افراد موجود ہیں جو بے گھر ہونے والوں میں شامل ہیں۔ غزہ شہر پر آج جمعرات کی صبح ہونے والی اسرائیلی بمباری کے نتیجے میں طلال عبدالسلام، ان کی اہلیہ اور ایک پوتی شہید ہوگئے۔ جبالیا کیمپ پر آج جمعرات کو اسرائیلی فوج نے دوبارہ توپ خانے سے گولہ باری کی۔