یوپی کے شاہجہاں پور میں مسجد پر بھگوا جھنڈا لگایا، تین نوجوان گرفتار۔

لکھنؤ: یوپی پولیس نے کہا کہ منگل کی رات شاہجہاں پور ضلع کی ایک مسجد میں بھگوا جھنڈا لہرانے پر تین شرپسندوں کو گرفتار کیا گیا۔ 22 جنوری کو ایودھیا میں پران پرتیشٹھا کے بعد مہاراشٹر میں فرقہ وارانہ کشیدگی کے واقعات ہوئے ہیں۔ اس کے بعد اب یوپی سے دھیرے دھیرے سوشل میڈیا پر ایسی خبریں آرہی ہیں۔ پولیس نے شاہجہاں پور ضلع میں واقعہ کی تصدیق کی ہے۔ شاہجہاں پور واقعہ رام چندر مشن تھانہ علاقہ کے لال باغ علاقہ میں پیش آیا۔ تینوں گرفتار ملزمان کی شناخت انکت کتھیریا، روہت جوشی اور روہت سکسینہ کے طور پر کی گئی ہے، جن کی عمریں 20 سال کے درمیان ہیں۔ پولیس نے بتایا کہ اس کا ساتھی پنکج سکسینہ مفرور ہے۔

ستیہ ہندی کے مطابق رام چندر مشن پولیس اسٹیشن کے انچارج سی پی شکلا نے کہا، ’’یہ واقعہ رات تقریباً 8 بجے پیش آیا۔ یہ تینوں لوگ ایک مسجد کے اوپر چڑھ گئے اور بھگوا جھنڈا لگایا جس پر جئے شری رام لکھا ہوا تھا۔

پولیس افسر کے مطابق، “مقامی رہائشی فیض اللہ کی شکایت کے بعد مقدمہ درج کیا گیا۔ تینوں ملزمان کو عدالتی تحویل میں بھیج دیا گیا ہے اور مزید کارروائی جاری ہے۔ پڑوس میں حالات معمول پر ہیں۔‘‘ ایف آئی آر تعزیرات ہند کی دفعہ 295 کے تحت درج کی گئی ہے (کسی بھی عبادت گاہ یا مقدس چیز کو تباہ کرنا، نقصان پہنچانا یا اس کی بے حرمتی کرنا جس کا مقصد کسی بھی طبقے کے مذہب کی توہین کرنا ہے)۔

شاہجہاں پور ضلع میں ایک اور واقعہ میں، کٹرا پولیس اسٹیشن کے دائرہ اختیار میں اقلیتی برادری کے چار لوگوں اور کچھ نامعلوم لوگوں کے خلاف بھگوا جھنڈے کی مبینہ طور پر بے توہین کرنے کے الزام میں مقدمہ درج کیا گیا تھا جس پر "جے شری رام” لکھا ہوا تھا۔ لیکن کٹرا تھانے کے ایس ایچ او گورو تیاگی نے کہا، "ہم نے کیس درج کر لیا ہے۔ لیکن تفتیش کے دوران ان کا کردار سامنے نہیں آیا ہے اور ہمیں شبہ ہے کہ انہیں ملوث کیا جا رہا ہے۔

ایودھیا میں 22 جنوری کو ہونے والے پران پرتیستھا کے بعد سوشل میڈیا پر ایسے ویڈیوز کے ساتھ معلومات کا سیلاب آگیا ہے جس میں مساجد اور درگاہوں پر بھگوا پرچم لہرانے کی کوشش کی گئی تھی۔ لیکن پولیس نے تمام معاملات کی تصدیق نہیں کی ہے۔ مہاراشٹر کے بعد یوپی سے بھی ایسی اطلاعات آرہی ہیں۔ مہاراشٹر میں، منگل، 23 جنوری کو، ہندو تنظیموں کے کچھ نوجوان پونے کے مشہور فلم انسٹی ٹیوٹ میں داخل ہوئے۔ انہوں نے ادارے کے احاطے میں لگائے گئے بینر کو پھاڑ دیا۔ بینر پر لکھا تھا- بابری مسجد کا انہدام آئین کے خلاف ہے۔ آنند پٹوردھن کی فلم رام کے نام گزشتہ رات یہاں دکھائی گئی۔