مدارس کے سامنے ایک اور بڑی پریشانی، سرکاری فنڈ سے مذہبی تعلیم پر الہ آباد ہائی کورٹ کا سوال، مدرسہ بورڈ ایکٹ اور نصاب پر مرکز کی مودی حکومت سے جواب طلب۔ امداد یافتہ مدارس کے ساتھ آزاد مدارس بھی ہوسکتے متاثر۔

نئی دہلی:  مدارس کے مستقبل پر بظاہر سوالیہ نشان لگتا نظر آرہا ہے کیونکہ ایک عرضی کے تحت عدالت میں کئی ایسے سوال اٹھائے گئے ہیں جو کافی الجھنیں آنے والے وقت میں پیدا کرسکتے ہیں۔

اس میں صرف امداد یافتہ مدارس ہی نہیں آئیں گے بلکہ آزاد مدارس بھی متاثر ہوسکتے ہیں۔ میڈیا رپورٹ کے مطابق الہ آباد ہائی کورٹ نے مرکزی وزارت تعلیم اورمرکزی وزارت برائے اقلیتی امور کو نوٹس جاری کرکے جواب طلب کیا ہے کہ کیا ریاست میں مذہبی تعلیم کی اجازت دینے والے آئینی اعتبارسے تعلیمی بورڈ ہوسکتے ہیں؟ جسٹس وویک چودھری اورجسٹس سبھاش ودیارتھی کی بینچ نے مدرسہ بورڈ اورمحکمہ اقلیتی امور، مرکزی حکومت، ریاستی حکومت اوردیگرمتعلقہ محکموں کے ذریعہ مدرسہ کے انتظامیہ کے بارے میں کچھ موضوعات کواٹھانے والی ایک رٹ پٹیشن کی سماعت کرتے ہوئے مرکزی حکومت سے یہ سوال پوچھا۔ اس ضمن میں مدرسہ بورڈ اوریوپی کی حکومت نے اپنا جواب داخل کردیا ہے۔ یوپی حکومت اورمدرسہ بورڈ کی جانب سے داخل کئے گئے حلف نامہ کو ریکارڈ پرلے لیا گیا ہے۔ اس پورے معاملے پرمدارس کے منتظمین میں تشویش کی صورتحال ہے اورتنظیمیں فکرمند ہیں۔بینچ نے کہا کہ اسے امید ہے کہ مرکزی وزارت تعلیم کے ساتھ ساتھ مرکزی وزارت برائے اقلیتی اموربھی تحریری جواب داخل کرے گا اور مرکزی حکومت کے وکیل سدھانشو چوہان 2 فروری کوعدالت میں اس سے متعلق جواب دیں گے۔ عرضی میں یوپی کے مذہبی تعلیمی قانون پرسوال اٹھایا گیا ہے۔ ساتھ ہی سرکاری فنڈ سے مذہبی تعلیم، مدرسہ بورڈ ایکٹ اورنصاب تعلیم کے تمام پہلوؤں پرسوال اٹھایا گیا ہے۔ عدالت اس معاملے میں 29 جنوری سے مستقل سماعت کررہی ہے۔ اس سے قبل مدرسہ بورڈ کو ریاست کے محکمہ تعلیم کے بجائے اقلیتی محکمہ کے تحت چلانے کی ضرورت پربھی مرکزی حکومت اوریوپی حکومت سے جواب طلب کیا تھا۔ ساتھ ہی تعلیمی اداروں کے منیجمنٹ یعنی انتظامیہ میں ممکنہ منمانی اورعدم شفافیت کے الزام کے موضوع پربھی تشویش کا اظہارکرتے ہوئے پوچھا تھا کہ کیا ایسے فیصلے مساوی مواقع اورسیکولراقدارکے اصولوں کے خلاف ہیں۔واضح رہے کہ انشومان سنگھ راٹھورکے ذریعہ داخل کی گئی عرضی میں یوپی بورڈ آف مدرسہ ایجوکیشن ایکٹ، 2004 اوربچوں کو مفت اورلازمی تعلیم کا حق (ترمیم) ایکٹ، 2012 کے التزامات کوبھی چیلنج دیا گیا ہے۔ عدالت 29 جنوری، 2024 سے اس معاملے کی ہرروزسماعت کررہی ہے۔ اس میں مرکزی حکومت، ریاستی حکومت اوریوپی مدرسہ تعلیمی بورڈ کے ساتھ مختلف سوالات بھی اٹھائے ہیں۔