نو گھنٹے پوچھ تاچھ کے بعد ای ڈی نے ایم ایل اے امانت اللہ خان کو کیا گرفتار۔

نئی دہلی: دہلی میں عام آدمی پارٹی (آپ) کی حکومت کی مشکلات میں اضافہ ہوتا جا رہا ہے۔ پہلے ڈپٹی سی ایم منیش سسودیا کو شراب کے مبینہ گھپلے کے الزام میں گرفتار کیا گیا تھا۔ اس کے بعد ای ڈی نے سی ایم اروند کیجریوال کو حراست میں لے لیا۔ اب ایک اور آپ ایم ایل اے کی گرفتاری کی خبر ہے۔ 

 ای ڈی ذرائع کے مطابق وقف بورڈ تقرری گھوٹالہ میں عام آدمی پارٹی کے ایم ایل اے امانت اللہ خان کو گرفتار کیا گیا ہے۔ سپریم کورٹ کے حکم پر امانت اللہ خان جمعرات (18 اپریل) کو ای ڈی کے سامنے پیش ہوئے۔ ای ڈی کے دفتر میں ان سے تقریباً 9.5 گھنٹے تک پوچھ گچھ کی گئی، جس کے بعد ایجنسی کے اہلکاروں نے انہیں گرفتار کر لیا۔

امانت اللہ خان پر دہلی وقف بورڈ کے چیئرمین کے طور پر 32 لوگوں کو غیر قانونی طور پر بھرتی کرنے کا الزام ہے۔ اس کے ساتھ انہوں نے غیر قانونی طور پر دہلی وقف بورڈ کی کئی جائیدادیں کرایہ پر دی ہیں۔  ایم ایل اے پر دہلی وقف بورڈ کے فنڈز کا غلط استعمال کرنے کا بھی الزام ہے۔ دہلی وقف بورڈ کے اس وقت کے سی ای او نے اس طرح کی غیر قانونی بھرتیوں کے خلاف بیان جاری کیا تھا۔ تفتیش کے دوران امانت اللہ کے قریبی ساتھیوں کے ٹھکانوں سے نقدی برآمد ہونے کا دعویٰ ہے۔

ایم ایل اے امانت اللہ خان کو ای ڈی نے چھ سمن بھیجے تھے۔ سمن ملنے کے بعد بھی امانت اللہ خان ای ڈی کے سامنے پیش نہیں ہوئے۔ ان کی جانب سے سپریم کورٹ میں پیشگی ضمانت کی درخواست دائر کی گئی تھی جسے عدالت نے یہ کہتے ہوئے مسترد کر دیا تھا کہ ایم ایل اے ہونے کی بنیاد پر آپ کو کوئی چھوٹ نہیں دی جا سکتی۔ قانون سب کے لیے برابر ہے۔ اس کے ساتھ ہی عدالت نے کہا کہ ای ڈی کے سمن کو بار بار نظر انداز کرنا غلط ہے۔ اس کے بعد خان ای ڈی کے سامنے پیش ہوئے۔