مسلمان ہر خسارہ کو برداشت کرسکتاہے لیکن شریعت میں کسی بھی مداخلت کو برداشت نہیں کرسکتاہے: مولانا ارشدمدنی، ملک کا مسلمان ہر اس بل کے خلاف ہوگا جِس میں جائیداد موقوفہ کی حفاظت کی ضمانت نہ ہو۔

نئی دہلی: صدر جمعیۃ علماء ہند مولاناارشدمدنی نے آج وقف بورڈ کے پارلیمنٹ میں پیش نئے ترمیم شدہ بل پر اپنے ردعمل کا اظہار کرتے ہوئے کہا کہ ان ترامیم کے ذریعہ حکومت وقف کی جائدادوں کی حیثیت اورنوعیت کو بدل دینا چاہتی ہے، تاکہ ان پر قبضہ کرنا آسان ہوجائے مجموعی طورپر نئی ترمیمات کی منظوری ہونے پر ایک کلکٹرراج وجودمیں آئے گااوریہ فیصلہ کرنا کہ کون سی جائدادوقف ہے اورکونسی وقف نہیں ہے وقف ٹربیونل کافیصلہ آخری نہیں ہوگابلکہ ملکیت کے سلسلہ میں کلکٹرکا فیصلہ آخری ہوگا، پہلے یہ اختیارات وقف ٹربیونل کو تھا،وقف ایکٹ میں کی جانے والی مجوزہ ترامیم آئین ہند سے حاصل مذہبی آزادی کے بھی خلاف ہے۔آئین ہند کی دفعات 15,14اور 25 کی خلاف ورزی ہے۔ترمیم سے عدالتی آزادی ختم ہوجائے گی اور یہ ترمیم امتیاز کرنے والیبھی ہے جوآئین کی بنیاد کے خلاف ہے۔وقف مسلمانوں کے اہم مذہبی فریضے میں شامل ہے۔وقف ٹریبونل ختم کرکے کلکٹر کے پاس اختیار ات دیئے جانے سے ہندوستان کی عدالتی آزادی ختم ہوجائے گی اور کلکٹر راج کی شروعات ہوگی۔ وقف سے حاصل ہونے والی رقم کو حکومت مسلمانو ں میں تقسیم کریگی اوروقف بورڈکے ممبران میں غیر مسلموں ممبربنانے جیسی بات کہی گئی ہے جبکہ کسی دوسرے مذاہب کے کسی بھی بورڈمیں کوئی دوسرے دھرم کا ماننے والا ممبرنہیں ہوسکتاہے،یہ حکومت کافیصلہ مذہبی معاملات میں مداخلت ہے جو مسلمانوں کو نا منظور ہے۔ مولانا مدنی نے کہا کہ یہ ہندومسلم کا مسئلہ نہیں ہے بلکہ ملک کے آئین، دستور اور سیکولرازم کا مسئلہ ہے، یہ بل ہماری مذہبی آزادی کے خلاف ہے، انہوں نے کہا کہ جب سے یہ حکومت آئی ہے طرح طرح کے حیلوں اوربہانوں سے مسلمانوں کو انتشار اورخوف میں مبتلارکھنے کے لئے ایسے ایسے نئے قانون لارہی ہے جس سے صریحاہمارے مذہبی امورمیں مداخلت ہوتی ہے، حالانکہ حکومت یہ بات اچھی طرح جانتی ہے کہ مسلمان ہر خسارہ برداشت کرسکتاہے، لیکن اپنی شریعت میں کوئی مداخلت برداشت نہیں کرسکتامولانا مدنی نے وضاحت کی کہ یہ ایک طرح سے مسلمانوں کو دیئے گئے آئینی اختیارات میں دانستہ مداخلت ہے، آئین نے ہر شہری کو مذہبی آزادی کے ساتھ ساتھ اپنے مذہبی امورپر عمل کرنے کا مکمل اختیاربھی دیاہے اورموجودہ حکومت آئین کے ذریعہ مسلمانوں کو دی گئی اس مذہبی آزادی کو چھین لینا چاہتی ہے۔ مولانا مدنی نے آگے کہاکہ مسلمانوں نے جو وقف کیا ہے اورجس مقصدکے لئے وقف کیا ہے، کوئی بھی شخص واقف کے منشاکے خلاف اس کااستعمال نہیں کرسکتاہے، کیونکہ یہ پراپرٹی وقف علی اللہ ہوتی ہیں، گورنمنٹ کی نیت خراب ہے ہمارے مذہبی مسئلہ میں دخل دینا چاہتی ہے اور مسلمانوں کی اربوں کھربوں کی جائدادوں کو ہڑپ کرنا چاہتی ہے، جیسا کہ اس نے ماضی میں خواہ وہ یوسی سی کامسئلہ ہو، یا طلاق کا مسئلہ ہویا نان نفقہ کا مسئلہ ہو، اس نے اس میں دخل دیا ہے،ہمیں ایسی کوئی ترمیم منظورنہیں جو واقف کے منشاء کے خلاف ہو، اب اس وقت گورنمنٹ اوقاف کے دستورمیں ترمیمی بل لاکر مسلمانوں کے مذہبی امور میں دخل دینے کی کوشش کررہی ہے لیکن جمعیۃعلماء ہند یہ واضح کردینا چاہتی ہے کہ وقف ایکٹ 2013میں کوئی ایسی تبدیلی جس سے وقف جائدادوں کی حیثیت یانوعیت بدل جائے یا کمزورہوجائے یہ ہرگز ہمیں قابل قبول نہیں ہے۔جمعیۃعلماء ہند نے ہر دورمیں وقف املاک کی حفاظت کو یقینی بنانے کے لئے مؤثراقدامات کئے ہیں اورآج بھی ہم اس عہد کے ساتھ آگے بڑھ رہے ہیں کہ ہندوستان کے بیس کروڑمسلمان بہارسے لیکر آندھراتک حکومت کے ہر اس منصوبہ کے خلاف ہوں گے جوجائدادموقوفہ کی حفاظت کی ضمانت نہ دیتاہو۔