امانت اللہ خان کی گرفتاری پر کورٹ کی روک۔

نئی دہلی ۔۱۳؍ فروری: دہلی کے اوکھلا سے عام آدمی پارٹی (اے اے پی) کے ایم ایل اے امانت اللہ خان کو جمعرات (13 فروری) کو عدالت سے بڑی راحت ملی۔ دہلی کی راؤس ایونیو کورٹ نے ان کی گرفتاری پر 24 فروری تک روک لگا دی۔ امانت اللہ خان نے 10 فروری کو جامعہ نگر میں پولیس ٹیم پر حملہ کرنے کے الزام میں گرفتاری سے بچنے کے لیے پیشگی ضمانت کی درخواست دائر کی تھی۔ اس پر آج سماعت ہوئی۔ سماعت کے دوران امانت اللہ خان کے وکیل نے کہا کہ وہ تحقیقات میں شامل ہونے کو تیار ہیں۔ انہوں نے دعویٰ کیا کہ ان پر لگائے گئے الزامات جھوٹے ہیں۔ اس پر عدالت نے کہا کہ امانت اللہ خان سے جامعہ نگر تھانے میں پوچھ گچھ کی جائے، یہ ایسی جگہ ہونی چاہیے جہاں سی سی ٹی وی کیمرے لگے ہوں۔پیر کو دہلی پولیس نے اوکھلا کے ایم ایل اے کے خلاف جامعہ نگر میں پولیس ٹیم پر حملہ کرنے کے الزام میں ایف آئی آر درج کی ہے۔ پولیس نے کہا کہ ایم ایل اے کی قیادت میں ہجوم نے قتل کی کوشش کے ایک ملزم شہباز خان کو حراست سے فرار ہونے میں مدد کی۔ پولیس نے بتایا کہ مبینہ واقعہ اس وقت پیش آیا جب دہلی پولیس کی کرائم برانچ نے ملزم شہباز خان کو گرفتار کرنے کی کوشش کی۔ پولیس ذرائع نے دعویٰ کیا تھا کہ خان تب سے مفرور ہے۔ اس کے لیے پولیس ٹیم نے کئی مقامات پر چھاپے بھی مارے۔ دریں اثنا، امانت اللہ خان نے بدھ (12 فروری) کو دہلی پولیس کمشنر سنجے اروڑہ کو ایک خط لکھا جس میں کہا گیا کہ پولیس انہیں جھوٹے مقدمے میں پھنس رہی ہے۔ وہ کہیں نہیں گئے، وہ اپنے اسمبلی حلقے میں ہیں۔