اترپردیش کے سبھی مدارس میں روزانہ قومی ترانہ پڑھنا لازمی، یوپی تعلیمی بورڈ نے جاری کیا سرکلر

اترپردیش کے سبھی مدارس میں روزانہ قومی ترانہ پڑھنا    لازمی، یوپی تعلیمی بورڈ نے جاری کیا سرکلر

لکھنؤ: اب اتر پردیش کے تمام مدارس میں قومی ترانہ ہوگا، یوپی کے تعلیمی بورڈ نے یہ حکم جاری کیا ہے۔ اتر پردیش مدرسہ ایجوکیشن بورڈ کے رجسٹرار ایس این پانڈے نے 9 مئی کو تمام ضلع اقلیتی بہبود کے افسران کو اس پر عمل آوری کا حکم جاری کیا تھا۔ 

حکام نے جمعرات کو بتایا کہ قومی ترانہ (جن گن من) گانا اب تمام مدارس میں لازمی قرار دے دیا گیا ہے۔افسران نے بتایا کہ یہ فیصلہ 24 مارچ کو بورڈ میٹنگ کے دوران لیا گیا تھا۔ جس میں تمام مدارس میں صبح کے دوران قومی ترانہ بجانے کو لازمی قرار دینے کا فیصلہ کیا گیا۔ انہوں نے کہا کہ رمضان کے بعد 12 مئی سے تمام مدارس میں باقاعدہ کلاسز کا آغاز ہو گیا تھا اور یہ حکم اسی دن سے نافذ ہو گیا۔

حکم نامے میں کہا گیا ہے کہ کلاسز شروع ہونے سے قبل اساتذہ اور طلباء کی جانب سے قومی ترانہ گایا جائے گا، یہ تمام تسلیم شدہ، مالی امداد یافتہ اور غیر مالی امداد یافتہ مدارس میں لاگو ہوگا۔ ضلع اقلیتی بہبود کے افسران کو حکم کی تعمیل کرنے کی ہدایات دی گئی ہیں۔ بی جے پی رہنما محسن رضا نے اس کا خیر مقدم کیا ہے۔ رضا نے کہا کہ اس سے بچوں میں وطن سے محبت بڑھے گی۔ یہ نظم و ضبط اور حب الوطنی کا درس دے گا۔

اساتذہ کی انجمن مدارس عربیہ کے جنرل سکریٹری دیوان صاحب زمان خان نے کہا، "اب تک، مدارس میں کلاس شروع ہونے سے پہلے صرف حمد (اللہ کے لیے) اور سلام (پیغمبر اکرم پر سلام) گایا جاتا تھا۔ کچھ مدارس میں قومی ترانہ گایا جاتا تھا، لیکن یہ لازمی نہیں تھا، جسے اب لازمی کر دیا گیا ہے۔

یہ حکم یوپی کے اقلیتی بہبود کے وزیر دھرم پال سنگھ کے اس بیان کے بعد آیا ہے، جس میں انہوں نے مدارس میں قوم پرستی کا سبق پڑھانے کی بات کی تھی۔ ریاستی وزیر دانش آزاد نے بھی کہا تھا کہ حکومت چاہتی ہے کہ مدرسے کے طلباء حب الوطنی کے جذبے سے لبریز ہوں۔ اس وقت یوپی میں 16,641 مدارس ہیں، جن میں سے 560 کو مالی امداد ملتی ہے۔