گیان واپی کا معاملہ فاسٹ ٹریک کورٹ میں منتقل۔

گیان واپی کا معاملہ فاسٹ ٹریک میں کورٹ منتقل۔

وارانسی :(ایجنسی)

اتر پردیش کے وارانسی میں گیان واپی معاملے کو لے کر ایک نئی عرضی پر اہم سماعت بدھ کے روز ہوئی۔ سول کورٹ سینئر ڈویژن کے جج روی دیواکر نے معاملے کی سماعت کرتے ہوئے اسے فاسٹ ٹریک کورٹ میں منتقل کر دیا ہے۔ اب اس معاملے کی آئندہ سماعت 30 مئی کو فاسٹ ٹریک کورٹ میں ہوگی۔ موصولہ اطلاعات کے مطابق فاسٹ ٹریک کورٹ کے جج مہندر پانڈے اس معاملے کی سماعت کریں گے۔

دراصل سینئر ڈویژن کورٹ میں منگل کے روز گیان واپی مسجد سے متعلق ایک نئی عرضی داخل کی گئی تھی۔ یہ عرضی ’وشو ویدک سناتن سنگھ‘ کے سربراہ جتیندر سنگھ بسین کی بیوی کرن سنگھ نے داخل کی تھی جس میں تین مطالبات رکھے گئے ہیں۔ عرضی کے مطابق پورے گیان واپی مسجد احاطہ میں مسلمانوں کے داخلے پر فوراً روک لگائے جانے، ہندوؤں کو گیان واپی احاطہ میں پوجا کا حق دینے اور مبینہ شیولنگ ملنے والی جگہ پر فوری اثر سے ہندوؤں کو پوجا کا حق دیے جانے کا مطالبہ کیا گیا ہے۔

قابل ذکر ہے کہ گزشتہ ایک مہینے سے گیان واپی مسئلہ پر عدالتوں میں سماعتیں ہو رہی ہیں اور سروے وغیرہ کا عمل بھی انجام پا چکا ہے۔ شرنگار گوری کے دَرشن کی اجازت سے متعلق عرضی پر سماعت کرتے ہوئے سول جج روی کمار دیواکر نے مسجد کا سروے کرانے کا حکم دیا تھا۔ کمیشن کی کارروائی کے بعد گیان واپی مسجد کے اندر وضو خانہ میں مبینہ طور پر ایک شیولنگ ہونے کی بات کہی گئی۔ حالانکہ مسلم فریق نے اسے فوارہ بتایا ہے۔ اس معاملے پر سماعت ضلع کورٹ میں چل رہی ہے اور 26 مئی کو اس سلسلے میں سماعت بھی ہونی ہے۔