تمام اعمال کا دارومدار نیت پر ہے: مولاناعبداللہ معروفی، جامعہ زینب للبنات دیوبند میں ختم بخاری شریف کے موقع پر دعائیہ مجلس منعقد۔

دیوبند: سمیر چودھری۔

جامعہ زینب للبنات میں ختم بخاری شریف کے موقع منعقد دعائیہ مجلس میں ارالعلوم دیوبند کے استاذ حدیث مولانا مفتی عبد اللہ معروفی نے بخاری کا آخری درس دیتے ہوئے کہا کہ تمام اعمال کا دارومدار نیت پر ہے۔ انہوں نے بخاری شریف کی آخری حدیث پر روشنی ڈالتے ہوئے کہا کہ نبی کریم ﷺ نے فرمایا کہ دو کلمے ایسے ہیں جو اللہ تعالے کو بے حد پسندہیں اور زبان پر ہلکے بھی ہیں وہ کلمے سبحان اللہ وبحمدہ سبحان اللہ العظیم ہیں۔انہوں کہا کہ امام بخاری نے کتاب کے شروع میں نیت کے صحیح کرنے کی تلقین کی ہے اور آخری حدیث میں بتایا کہ اعمال وزن کیے جائیں گے اور اعمال میں وزن اخلاص سے پیدا ہوگا،اور اخلاص عمل کی روح ہوتی ہے اس لئے عمل میں اخلاص کا ہونا بے حد ضروری ہے۔

مولانا عبد اللہ معروفی نے کہا کہ پہلا مدرسہ ماں کی گود ہے لہذا ماں کا تعلیم یافتہ ہونا ضروری ہے اس لئے کہ یہ بات واضح ہے ایک خاتون کا تعلیم یافتہ ہونا پورے خاندان کے تعلیم یافتہ ہونے کی سیڑھی بنتا ہے۔ادارے کے استاذ مفتی عمار عزیز عثمانی نے کہا کہ اسلام پہلا مذہب ہے جس کا باضابطہ آغاز تعلیم و تعلم کی آیت اقرا سے شروع ہوا،انہوں نے مدارس اسلامیہ کے مقاصد پر روشنی ڈالتے ہوئے کہا کہ مدارس کا اہم مقصد علم دین کو مسلمانوں تک پہنچانا ہے انہوں نے کہا کہ علم دین کی اہمیت اور افادیت کا کوئی بھی شخص منکر نہیں ہے اس لئے کہ قرآن و حدیث میں اس علم کو فلاح اور کامیابی کا ذریعہ قرار دیا گیا ہے۔

ادارے کے استاذمفتی اخیار الٰہی نے کہا کہ والدین کی ذمہ داری ہے کہ وہ سب سے پہلے اپنے بچے کو دینی کی تعلیم دیںتاکہ ان کا ایمان و عقیدہ درست رہے اور ان کا کردار اسلامی ہو، ان کا تعلق اللہ سے قائم ہو،وہ دین پر صحیح طور پر عمل پیراں ہوں تا کہ آنے والی نسلوں کی بھی صحیح تربیت کر سکیں۔انہوں نے کہا کہ یہ بھی ایک حقیقت ہے کہ کسی بھی قوم کو مجموعی طور دین سے روشناس کرانے اور خصائل جمیلہ سے مزین کرنے میں اس قوم کی خواتین کا اہم بلکہ مرکزی کردار ہوتا ہے اسلئے خواتین کی تعلیم مزید اہم ہے۔

جامعہ کے استاذ مولانا خالد عزیر قاسمی جامعہ کی تعلیمی و تربیتی سرگرمیوں پر روشنی ڈالی اور بتایا کہ جامعہ میں ابتدائی درجات سے پانچویں کلاس تک مکمل عصری تعلیم کا نظم ہے اور ساتھ ہی عالمہ کے کورس سے فارغ ہونے والی طالبات کے لئے NIOSکے ذریعے دسویں اور بارہویں کلاس کے امتحانات کا نظم بھی کیا گیا ہے۔انہوں نے کہاکہ اس کے علاوہ جامعہ نے جمعیت یوتھ کلب کے ساتھ مل کر طالبات کے لئے ایک خصوصی کیمپ کا انعقاد بھی کرایا جس میں طالبات کو صحت،اور بوقت ضرورت ابتدائی طبی سہولیات اور دیگر فنون کی ٹریننگ دی جاتی ہے،اور طالبات میں خدمت خلق کے جذبے کو بیدار کیا جاتا ہے۔پروگرام کا آغاز جامعہ کی طالبہ مدیحہ کی تلاوت کلام پاک اور عالیہ ناصر کی نعت پاک سے ہوا،اس موقعہ پر مفتی طیب صدیقی، مسرور الحسن، محمد ارشاد، مفتی عظیم، محمد شرف الدین اور عارف عثمانی و دیگر افرادموجود رہے۔