جے پور بم بلاسٹ کے ملزموں کے باعزت بری ہونے سے اشوک گہلوت خفا، ایڈووکیٹ جنرل کو ہٹایا، سپریم جائیں گے۔

جے پور: راجستھان کے سی ایم اشوک گہلوت نے دیر رات ایک اعلیٰ سطحی میٹنگ کر کے جے پور بم دھماکہ کیس میں سزائے موت کے ملزمین کی بری ہونے کا جائزہ لیا۔ چیف منسٹر نے کیس کی کمزور پراسیکیوشن پر ایڈیشنل ایڈوکیٹ جنرل (اے اے جی) راجندر یادو کو فوری طور پر ہٹانے کا فیصلہ کیا ہے

اے اے جی کو اس کیس کی کارروائی کا کام سونپا گیا تھا۔ اب وزیراعلیٰ نے دھماکے کے کیس میں بری ہونے والے ملزمان کے خلاف جلد از جلد سپریم کورٹ میں خصوصی رخصت کی درخواست (SLP) دائر کرنے کا حکم دیا ہے۔

میٹنگ میں انہوں نے کہا کہ 2019 کے ضلعی عدالت کے فیصلے کو پلٹتے ہوئے راجستھان ہائی کورٹ نے تمام ملزمان کو بری کر دیا ہے۔ ریاستی حکومت کی منشا ہے کہ مجرموں کو سخت ترین سزا ملے، اس لیے ریاستی حکومت جلد ہی ہائی کورٹ کے فیصلے کے خلاف سپریم کورٹ میں ایس ایل پی دائر کرے گی۔ ریاستی حکومت بہترین وکلاء کو شامل کرکے متاثرین کو انصاف فراہم کرے گی۔

دیر رات کی میٹنگ میں چیف سکریٹری اوشا شرما، محکمہ داخلہ کے سربراہ سچی آنند کمار، ڈی جی پی امیش مشرا، اے ڈی جی ایس او جی اے ٹی ایس اشوک راٹھور، اے ڈی جی کرائم دنیش ایم این، اے ڈی جی انٹیلی جنس ایس۔ سنگتیر، محکمہ قانون کے پرنسپل سیکریٹری گیان پرکاش گپتا اور سیکریٹری داخلہ (قانون) روی شرما موجود تھے۔