تراویح میں ختم قرآن کا مطلب ختم تراویح نہیں ہے، تکمیل قرآنِ کریم کے موقع پر آل انڈیا مسلم مجلس مشاورت پنجاب کے صدر قاری محمد اکرم کا خطاب۔

لدھیانہ: سمیر چودھری۔

رمضان المبارک میں ایک ختم قرآن کریم کا تراویح میں سننا سنت موکدہ ہے دوسری سنت چاند دیکھ کرتراویح شروع کرنا اور عید کا چاند دیکھ کر تراویح کی نماز چھوڑ دینا ہے ہمارے یہاں عموماً مسلمان پہلی سنت یعنی قرآن کریم ایک ختم تراویح میں سننے کا اہتمام خوب کرتے ہیں کہیں چھ دن میں تراویح میں ختم قرآن ہو رہا ہے کہیں دس دن میں اور کہیں پندرہ دن میں بعض تین دن میں اور بعض ایک ہی رات میں ختم کر کرا کر فارغ ہو لیتے ہیں اس کے بعد تراویح سے غافل ہو جاتے ہیں حالانکہ ابھی تو تراویح میں قرآن کریم پورا ہوا ہے تراویح تو عید کا چاند دیکھ کر ختم ہو گی اس لیے مسلمانوں کو اس پورے ماہ تراویح کا اہتمام کرنا چاہیے جہاں موقع ملے جماعت میں شریک ہو جائیں سورة تراویح پڑھ لیں، سحری سے تھوڑا قبل اٹھ کر تہجد کی چند رکعت پڑھ لیا کریں، اللہ کے یہاں اس کا بڑا ثواب ہے۔ 

ان خیالات کا اظہار آل انڈیا مسلم مجلس مشاورات پنجاب کے صدر و مدرسہ رحمت اللعالمین کے مھتمم قاری محمد اکرم نے عثمان لدھیانہ کے یہاں قرآن سنا رہے حافظ محمد سعدان اور حافظ محمد مزین کے تراویح میں ختم قرآن پاک کے موقع پر دوران خطاب کیا۔ اس موقع سے قاری صاحب نے رمضان المبارک میں قرآن پاک کی تلاوت کے اہتمام پر زور دیا اور صحت کے ساتھ قرآن کریم پڑھنے کی ضرورت پر روشنی ڈالی انہوں نے فرمایا کہ مساجد اور مدارس میں صحت کے ساتھ قرآن کریم پڑھانے کے حلقے لگانے چاہیے تاکہ بڑے بوڑھوں ہماری ماوں اور بہنوں کا بھی قرآن صحیح ہو انہوں نے اس موقع سے حافظ صاحب کو مبارکباد پیش کی اور مصلیان کے لیے قبولیت کی دعاءفرمائی۔