دارالعلوم دیوبند نے خوراک فروختگی پر لگائی پابندی، خلاف ورزی پر سخت کارروائی کا انتباہ ،نہر میں نہانے جانے والوں پر بھی ہوگی سخت کارروائی۔

دیوبند:سمیر چودھری۔

عالمی شہرت یافتہ دینی دانش گاہ دارا لعلو م دیوبند کی جانب سے طلبہ کو ملنے والے کھانے(خوراک) کو فروخت کرنے پر پابندی عائد کردی ہے ۔ اس سلسلہ میں مہتمم مولانا مفتی ابوالقاسم نعمانی کی جانب سے جاری ایک اعلان دارالعلوم کے احاطہ میں چسپاں کیا گیاہے ۔ جس میں انتباہ دیا گیا ہے کہ ادارہ کی جانب سے دیئے جانے والے کھانے کو اگر کوئی طالب علم فروخت کرتا ہوا پایا گیا تو اس کے خلاف سخت کارروائی کی جائیگی ۔ مفتی ابو القاسم نعمانی نے کہا کہ ادارہ کی جانب سے طلبہ کو دو وقت کا کھانا اس لئے دیا جاتا ہے تاکہ وہ کھانا بنانے کی پریشانی سے بچ سکیں اور اپنازیادہ وقت تعلیم کے حصول میں صرف کریں، انہوں نے سخت انتباہ دیتے ہوئے کہا کہ طلبہ ہر گز اپنا کھانافروخت نہ کریں اگر انہیں کھانا نہ لینا ہو تو وہ درخواست دیکر 700 روپئے ماہانہ وظیفہ لے سکتے ہیں۔ انہوں نے کہا کہ اگراس اعلان کے بعد کوئی طالب علم کھانا فروخت کرتے ہوئے پکڑا گیا تو دو مہینہ کے لئے اس کا کھانا بندکردیا جائے گا اور ادارہ کی جانب سے دیگر کارروائی بھی کی جائی گی ۔ اس کام کی نگرانی کے لئے اساتذہ کی ڈیوٹی لگائی گئی ہے ۔ وہیں ایک دوسر ے اعلان کے ذریعہ دیوبند کے قریب ساکھن نہر پر طلبہ کے نہانے کے لئے جانے پر بھی پابندی عائد کردی گئی ہے ۔ دارالعلوم انتظامیہ کا کہناہے کہ نہر پر جاتے ہوئے کئی طلبہ کے ساتھ حادثات پیش آچکے ہیں ، اعلان میںکہاگیا ہے کہ اگر ساکھن نہر پر کوئی طالب علم جاتاہوا یا نہاتاہو ا پایا گیا تو اس کے خلا ف بھی کار روائی کی جائی گی ،اس سلسلہ میں ایک نگرانی کمیٹی تشکیل دی گئی ہے۔