مظفر نگر کھتولی، بڈھانہ اور جانسٹھ تحصیلوں کے امیدواروں نے اگنیویر بھرتی ریلی میں حصہ لیا۔

 مظفر نگر: عزیز الرحمن خاں۔

مظفر نگر ضلع کے امیدواروں نے ضلع میں جاری اگنی ویر ریلی بھرتی میں اپنی طاقت دکھائی۔ اگنیور بھرتی میں حصہ لینے کے لیے امیدوار ایک دن پہلے پہنچ گئے تھے۔ صبح تقریباً ایک بجے امیدواروں کو اسٹیڈیم میں داخلہ دیا گیا۔ اس کے بعد فوجی حکام نے امیدواروں کے سرٹیفکیٹ چیک کئے۔ اسکریننگ کے بعد امیدواروں کو بیچوں میں تقسیم کیا گیا۔ مظفر نگر کے صدر، بڈھانہ، کھتولی اور جانسٹھ تحصیلوں کے امیدواروں نے اسپورٹس اسٹیڈیم میں اگنیویر بھرتی ریلی میں حصہ لیا۔ مظفر نگر کے امیدواروں نے قومی خدمت کے جذبے کے ساتھ ریلی میں شرکت کی۔ اس دوران فوجی افسران نے امیدواروں کی حوصلہ افزائی کی۔ ریس میں کامیاب ہونے والے امیدواروں کو زیگ زیگ، بیم، چن اپ، پل اپ وغیرہ جیسے ٹیسٹوں کے ذریعے پرکھا گیا۔

اتوار کے روز تک بلند شہر ضلع کے امیدوار اگنیویر ریلی میں شرکت کریں گے۔ جبکہ 20 اگست کو سہارنپور ضلع کے امیدوار بھی حصہ لیں گے۔ 19 اگست کو بلند شہر کی تحصیل خورجہ، سائنا اور انوپ شہر کے لئے بھرتی ہوگی۔ جبکہ 20 اگست کو بلند شہر کے دیبائی اور سہارنپور کی بیہت، صدر، ناکود، دیوبند اور رام پور منیہاران تحصیلوں کے لیے بھرتی کی جائے گی۔

اسپورٹس اسٹیڈیم میں اگنیور بھرتی ریلی کے دوران سیکورٹی کے خاطر خواہ انتظامات کیے گئے ہیں فوج کے جوانوں کے ساتھ پولیس فورس بھی سیکورٹی میں تعینات ہے۔