ولی عہد شہزادہ محمد بن سلمان اور وزیر اعظم مودی نے ہند۔سعودی عرب تعلقات کو مستحکم بنا نے کے لئے کئی مشترکہ معاہدوں پر دستخط کئے۔

نئی دہلی: سعودی عرب کے ولی عہد شہزادہ محمد بن سلمان اور ہندوستانی وزیر اعظم نریندر مودی نے پیر کو دونوں ملکوں کے درمیان دو طرفہ تعلقات کو مضبوط بنانے کے لیے کئی مشترکہ معاہدوں پر دستخط کیے۔یہ معاہدےآئی ٹی، زراعت، فارماسیوٹیکل، پیٹرو کیمیکلز اور انسانی وسائل سمیت مختلف شعبوں پر محیط ہیں۔

سعودی عرب اور ہندوستان کے درمیان پائیدار اشتراک کو اجاگر کرتے ہوئے ولی عہد نے کہا کہ ان کی تاریخ میں کوئی اختلاف نہیں تھا، بلکہ تعاون کا جذبہ تھا جس کا مقصد دونوں ممالک کا خوشحال مستقبل ہے۔ولی عہد نے کہا کہ سعودی عرب بھارت کے ساتھ اقتصادی راہداری پر عمل درآمد کے لیے کام کر رہا ہے اور اس منصوبے کو حاصل کرنے کے لیے محنت کی ضرورت ہے۔شہزادہ محمدبن سلمان نے سعودی عرب میں ہندوستانی کمیونٹی کی اہم حصہ کا بھی اعتراف کیا کیونکہ سعودی آبادی کا سات فیصد حصہ ہندنژاد ہے۔ انہوں نے سعودی عرب کی جانب سے انہیں ملک کا اٹوٹ جز سمجھنے اور ان کی فلاح و بہبود کو یقینی بنانے کے عزم کا اظہار کیا۔

مودی نے سعودی ولی عہد سے کہا کہ ہم نے مل کر اقتصادی راہداری کے قیام کا تاریخی آغاز کیا۔ مودی نے کہاکہ بھارت-سعودی عرب اشتراک خطے اور دنیا کے استحکام اور فلاح وبہبود کیلئے بے حد اہم ہے۔ اُنہوں نے کہاکہ بھارت، مغربی ایشیا اور یوروپ کے درمیان ایک تاریخی اقتصادی کوریڈور شروع کرنے کے بارے میں کَل فیصلہ کیا گیا ہے۔ وزیراعظم نے کہاکہ یہ کوریڈور نہ صرف دونوں ملکوں کو جوڑے گا، بلکہ ایشیا، مغربی ایشیا اور یوروپ کے درمیان اقتصادی ترقی اور ڈیجیٹل کنکٹی ویٹی فراہم کرنے میں بھی مدد کرے گا۔

سعودی ولی عہد محمد بن سلمان نےکہا کہ سعودی عرب اور بھارت کے درمیان مستقبل کی تعمیر اور مواقع پیدا کرنے کے لیے تعاون موجود ہے اور مستقبل کے مواقعوں پرکام کیا جارہا ہے۔

وزیراعظم مودی نے کہا کہ بھارت کے لیے سعودی عرب اس کے اہم ترین اسٹریٹجک شراکت داروں میں سے ایک ہے اور دونوں کا باہمی تعاون پورے خطے میں امن اور استحکام کے لیے اہم ہے۔