تعدد ازدواج والے سرکاری ملازمین نوکری سے جائیں گے، دوسری شادی کےلیےسرکارسے اجازت لازمی، آسام حکومت کا سرکلر جاری، فوری طور پر نافذ کرنے کی ہدایت۔

گوہاٹی: آسام میں اب سرکاری ملازمین کو دوسری شادی کے لیے ریاستی حکومت سے اجازت لینا ہوگی۔ ریاست کی ہمنتا بسوا سرما حکومت نے 20 اکتوبر کو ایک سرکلر جاری کرکے یہ اطلاع دی ہے۔ حکومت نے اسے فوری طور پر نافذ کرنے کی ہدایت کی ہے۔سرکلر کے مطابق کوئی بھی سرکاری ملازم جس کی بیوی یا شوہر زندہ ہیں وہ حکومت کی اجازت کے بغیر دوسری شادی نہیں کر سکتا۔ چاہے ایسی شادی مذہب یا پرسنل لاء کے تحت جائز ہو۔ ایسا نہ کرنے کی صورت میں قانونی کارروائی کی جائے گی۔ سرکلر میں یہ بھی لکھا گیا ہے کہ اگر کوئی ان قوانین کو نظر انداز کر کے دوسری شادی کرتا ہے تو اس کے خلاف قانونی کارروائی کی جائے گی۔ خاص حالات میں حکومت سے اجازت لے کر دوسری شادی کی جا سکتی ہے۔اس میں طلاق کے معیار کے بارے میں کچھ نہیں لکھا تھا۔ 

ریاست کے پرسنل ڈپارٹمنٹ کے ایڈیشنل چیف سکریٹری نیرج ورما کی طرف سے جاری کردہ سرکلر میں خبردار کیا گیا ہے کہ اگر کوئی ملازم حکم کے خلاف دوسری شادی کرتا ہے تو اسے لازمی ریٹائرمنٹ سمیت دیگر تعزیری کاروائیوں کا سامنا کرنا پڑ سکتا ہے۔ کسی بھی سرکاری ملازم کے لیے دوسری شادی کرنا اچھا سلوک نہیں سمجھا جاتا۔ اس کا معاشرے پر بڑا اثر پڑتا ہے۔یہ سرکلر ریاست کے 58 سالہ پرانے آسام سول سروسز (کنڈکٹ) رولز 1965 کے تحت جاری کیا گیا ہے۔ اپنے رول 26 کو بنیاد بناتے ہوئے حکومت نے ریاستی ملازمین کو دوسری شادی کے اصول کے بارے میں یاد دلایا ہے۔ 

میڈیا رپورٹس کے مطابق ریاست کی ہمانتا بسوا سرما کی حکومت نے کم عمری کی شادی پر پابندی عائد کر دی ہے۔ جس کی وجہ سے فروری سے اب تک ریاست بھر میں ہزاروں گرفتاریاں کی جا چکی ہیں۔اکتوبر کے شروع میں پولیس نے کم عمر لڑکیوں کی شادی کو روکنے کے لیے ایک مہم شروع کی، جس میں 1,039 افراد کو گرفتار کیا گیا۔ ان میں سے زیادہ تر مقدمات میں لڑکیوں کی ان کی مرضی کے خلاف شادی شامل تھی۔ ریاستی حکومت نے تعدد ازدواج کے مجوزہ قانون کا خاکہ تیار کرنے کے لیے ایک تین رکنی پینل تشکیل دیا ہے۔کمیٹی نے اپنے قانونی مسائل پر غور کرتے ہوئے اس تجویز کی منظوری دی ہے۔ ہائی کورٹ کے ایک ریٹائرڈ جج کی سربراہی والی اس کمیٹی نے کہا کہ اس تجویز کے لیے آسام کے گورنر کے بجائے صرف صدر کی اجازت درکار ہے۔