فیکٹری میں ہوئے دھماکے میں چار افراد کی موت، ایک درجن زخمی، ملبے میں کئی لوگوں کے دبے ہونے کا خدشہ۔

مظفرنگر: عزیز الرحمن خاں۔

میرٹھ کے لوہیا نگر میں واقع ایک مکان میں منگل کی صبح ایک بڑا حادثہ پیش آیا۔ یہاں ایک گھر میں کام کرنے والی فیکٹری میں زور دار دھماکے سے پورا علاقہ لرز اٹھا۔ دھماکا اس قدر زوردار تھا کہ جس گھر میں فیکٹری چل رہی تھی اس کے ساتھ قریبی دو تین مکان بھی گر گئے۔

حادثے میں چار افراد کی موت ہو گئی ہے جبکہ دس سے زائد افراد شدید زخمی ہیں۔ جنہیں میڈیکل میں داخل کرایا گیا ہے۔ ڈی ایم اور مجسٹریٹ سمیت کئی اہلکار موقع پر پہنچ گئے ہیں۔ ڈی ایم دیپک مینا کے مطابق پٹاخے کی فیکٹری جیسی کوئی چیز سامنے نہیں آئی ہے، موقع پر بڑی مقدار میں صابن بکھری ہوئی ملی ہے۔

بتایا جا رہا ہے کہ گھر میں کئی لوگوں کے دبے ہونے کا خدشہ ہے۔ دھماکہ اتنا زور دار تھا کہ 33 کے وی لائن کے ستون بھی ٹوٹ گئے۔ سڑک پر جانے والے کئی افراد زخمی ہو گئے۔ دھماکے سے قریب 3 سے 4 کلومیٹر تک کے مکانات لرز گئے۔ جو مکان منہدم ہوا وہ سنجے گپتا کا بتایا جاتا ہے جسے گورو تیاگی نامی شخص نے کرایہ پر لیا تھا۔ پولیس موقع پر پہنچ گئی ہے اور تحقیقات کر رہی ہے۔

وہ گھر جہاں فیکٹری چلتی تھی وہ ستیہ کام اسکول کے قریب ہے۔ دھماکہ سکول کے اوقات سے پہلے ہوا ورنہ بڑا نقصان ہو سکتا تھا۔ تین مکانات گرنے کے ساتھ ساتھ دور دراز کے گھر بھی دھماکے سے لرز گئے۔ ستیہ کام اسکول کے علاوہ آس پاس کے تمام گھروں کے شیشے ٹوٹ گئے۔ موقع پر افراتفری ہے۔ بہت سے شدید جھلس گئے زخمیوں کو ہسپتال بھیجا گیا ہے۔حادثے کی اطلاع ملتے ہی ڈی ایم دیپک مینا اور سٹی مجسٹریٹ سمیت تمام اہلکار موقع پر پہنچ گئے۔ موقع پر ایک بڑا ہجوم موجود ہے۔ راحت اور بچاؤ کاموں کے لیے این ڈی آر ایف کو بھی موقع پر بلایا گیا ہے۔ بتایا گیا کہ پولیس ٹیم امدادی کاموں میں مصروف تھی کہ اس دوران بھی یکے بعد دیگرے دو دھماکے ہوئے جس میں جے سی بی ڈرائیور زخمی ہوگیا۔ ٹیم موقع پر ریسکیو کام میں مصروف ہے۔ ڈی ایم دیپک مینا کا کہنا ہے کہ مرنے والوں کی ابھی تک شناخت نہیں ہوسکی ہے۔ یہ سب فیکٹری ورکرز ہو سکتے ہیں۔ شناخت کے لیے کوششیں کی جا رہی ہیں۔