طالب علم کے ساتھ مارپیٹ اور بدفعلی کئے جانے کے خلاف دیہی باشندوں کا سی او سٹی کے دفتر پر احتجاج، ملزموں کی گرفتاری کا مطالبہ۔

مظفرنگر: عزیز الرحمن خاں۔

شاملی جواہر نوودیا ودیالیہ بھینسوال میں ایک طالب علم کے ساتھ مارپیٹ اور بدفعلی کے معاملے میں پولیس کے ذریعہ ملزمان کو گرفتار نہ کرنے کی وجہ سے متاثرہ کے والد نے سی او سٹی سے ملزموں کی فوری گرفتاری کا مطالبہ کیا ہے۔ متاثرہ نے پولیس پر ہر روز اسے ہراساں کرنے کا الزام بھی لگایا ہے۔

 جانکاری کے مطابق علاقے کے لنک گاؤں کے لوگ سی او سٹی آفس پہنچے۔ گاؤں والوں نے بتایا کہ گاؤں کا بیٹا بھینسوال میں واقع جواہر نوودیا ودیالیہ میں پڑھتا تھا۔ اسکول کے کچھ طالب علموں نے اس کے بیٹے کو مارا پیٹا اور بدفعلی کی۔ طالب علم نے اس معاملے سے اپنے گھر والوں کو آگاہ کیا تھا جس کے بعد اسکول کے آٹھ طلباء کے خلاف مقدمہ درج کیا گیا تھا۔ پولیس نے تین طالب علموں کو چائلڈ پروٹیکشن سنٹر بھجوا دیا تھا جبکہ دیگر پانچ ملزمان کے خلاف آج تک کوئی کارروائی نہیں کی گئی۔ آدرش منڈی تھانہ انچارج بھی انہیں ہر بار یقین دہانی کراتے ہیں لیکن کوئی کارروائی نہیں ہو رہی، انہیں بتایا جاتا ہے کہ ہم جب بھی چھاپہ مارنے جاتے ہیں، ملزمان کے گھروں پر تالے لگے رہتے ہیں۔ متاثرہ کے والد اور گاؤں والوں نے سی او سٹی سے باقی پانچ ملزمان کی فوری گرفتاری کا بھی مطالبہ کیا ہے۔ سی او سٹی شیامبیر سنگھ نے آدرش منڈی تھانہ انچارج دیویندر کمار کو اپنے دفتر بلایا اور کارروائی کرنے کی ہدایت دی۔ اسٹیشن انچارج نے اہل خانہ اور گاؤں والوں کو یقین دلایا ہے کہ تین دن کے اندر کارروائی کی جائے گی۔