شاملی میں این آئی اے کا آئی ایس آئی ایجنٹ کے گھر پر چھاپہ، گھر والوں سے چار گھنٹے تک پوچھ گچھ، گھر سیل، علاقے میں خوف و ہراس۔

مظفرنگر: عزیز الرحمن خاں۔

شاملی میں آئی ایس آئی ایجنٹ کلیم کے معاملے میں این آئی اے کی ٹیم نے مقامی پولیس اور انتظامیہ کے ساتھ محلہ نو کنواں روڈ پر صبح چار بجے چھاپہ مارا۔ کلیم کے والدین اور خاندان کے دیگر افراد سے تقریباً چار گھنٹے تک پوچھ گچھ کی گئی۔ اس دوران ٹیم نے کچھ سامان بھی قبضے میں لیا ہے، خیال کیا جا رہا ہے کہ کیس میں ابھی کوئی بڑا انکشاف ہو سکتا ہے۔ ٹیم نے این آئی اے کے ذریعہ کلیم کے ایک مکان کو سیل کردیا ہے۔

دراصل، ایس ٹی ایف اور پولیس نے شاملی کے نو کنواں روڈ کے کلیم کو 17 اگست کو پکڑا تھا۔ دعویٰ کیا گیا کہ کلیم آئی ایس آئی کا ایجنٹ تھا اور پاکستان میں بیٹھے آئی ایس آئی ایجنٹ دلشاد مرزا سے رابطے میں تھا۔ کلیم کا بھائی تحسین بھی آئی ایس آئی سے رابطے میں ہے۔ بھارت کے فوجی علاقوں اور دیگر مقامات کی تصاویر بھی واٹس ایپ پر بھیجی گئیں۔ جانچ میں یہ بات سامنے آئی تھی کہ سہارنپور کا رہنے والا یوسف شمشی بھی ان دونوں سے رابطے میں تھا اور جعلی سم فراہم کرتا تھا۔

چھاپے کے دوران ٹیم نے ایک بیگ اور دیگر سامان بھی اپنے قبضے میں لے لیا۔ مفرور ملزم تحسین کے بارے میں بھی معلومات حاصل کی گئیں۔ اس کے بعد ٹیم دہلی واپس چلی گئی۔ تھانہ انچارج نے بتایا کہ این آئی اے نے چھاپہ مارا تھا۔ کلیم کے بارے میں ان کے گھر والوں سے معلومات حاصل کیں۔