مظفر نگر میں بھارتیہ کسان یونین کا ضلع مجسٹریٹ کے دفتر پر زبردست مظاہرہ، یونین کے لیڈروں کو مجرمانہ مقدمات میں پھنسانے کا الزام۔

 مظفر نگر: عزیز الرحمن خاں۔

 مظفرنگر میں بھارتیہ کسان یونین کے کارکنوں نے آج اعلیٰ قیادت کی ہدایت پر ضلع ہیڈکوارٹر پر احتجاجی مظاہرہ کیا اور الزام لگایا کہ انہیں ملک میں متحدہ کسان مورچہ کے لیڈروں کے خلاف مجرمانہ مقدمات میں پھنسایا جا رہا ہے۔ اس دوران صدر جمہوریہ ہند کو بھیجے گئے میمورنڈم میں کسان لیڈروں کے خلاف مقدمات اور توہین آمیز کارروائیوں کو روکنے کا مطالبہ کیا گیا ہے۔

مہاویر چوک پر بھارتیہ کسان یونین کے ضلعی دفتر میں یونین کے رہنما اور کارکنان جمع ہوئے۔ یہاں سے ضلع صدر یوگیش شرما کی قیادت میں تمام کارکنان حکومت مخالف نعرے لگاتے ہوئے جلوس کی شکل میں پیدل کلکٹریٹ پہنچے اور ڈی ایم آفس کے سامنے دھرنے پر بیٹھ گئے۔ اس دوران ضلع صدر یوگیش شرما نے الزام لگایا کہ کسان لیڈروں کی توہین کے ساتھ مرکز اور ریاست کی بی جے پی حکومتوں کی طرف سے انہیں مجرمانہ مقدمات میں غلط طریقے سے پھنسانے کی سازش رچی جارہی ہے۔ انہوں نے کہا کہ نومبر کے مہینے میں جب بی کے یو کے قومی جنرل سکریٹری کسان نمائندوں کے ساتھ بیرون ملک کسان کانفرنس میں شرکت کے لیے جا رہے تھے تو انہیں اندرا گاندھی ہوائی اڈے نئی دہلی پر روک لیا گیا۔ اس کی گرفتاری کے لیے کوششیں جاری تھیں، اسے بیرون ملک جانے سے روکنے کی سازش رچی گئی۔ اسی طرح دوسرے کسان لیڈروں کے ساتھ بھی ایسا ہی کیا جا رہا ہے۔