فیضان میڈی کیئر ملٹی اسپیشلٹی ہاسپٹل میں مفت طبی کیمپ، ثناخان اور ان کے شوہر مفتی انس کے ذریعے افتتاح، ،سینکڑوں مریض فیضیاب۔

دیوبند: سمیر چودھری۔

فیضان میڈی کیئر ملٹی اسپیشلٹی ہاسپٹل دیوبند کی جانب سے ایک مفت طبی کیمپ منعقد کیا گیا، جس کا افتتاح مشہور اسلامی اسکالر مفتی سید انس اور ان کی اہلیہ ثناء خان نے فیتہ کاٹ کر کیا۔ اس موقع پرڈاکٹروں نے 300سے زائد مریضوں کی جانچ کر کے انہیں مفت دوائیں تقسیم کیں۔ پیر کے روز عیدگاہ روڑ پر واقع فیضان میڈی کیئر ہاسپٹل کے احاطہ میں منعقد فری میڈیکل کیمپ میں ڈاکٹر سلیم الرحمن، ڈاکٹر ورون سنگھ، ڈاکٹر ملک رائو، ڈاکٹر وندنا آریہ،ڈاکٹر عرشی، ڈاکٹر اسد خان، ڈاکٹر مستقیم اور ڈاکٹر شارق پر مشتمل میڈیکل ٹیم نے کیمپ میں آنے والے سبھی مریضوں کی جانچ کر کے انہیں اسپتال کی جانب سے مفت دوائیں تقسیم کیں۔ اس کے علاوہ مریضوں کے فری ایکسرے بھی کئے گئے۔ اس موقع پر مہمان خصوصی مفتی سید انس اور ثناء خان نے خدمت خلق سے متعلق اظہار خیال کرتے ہوئے کہا کہ غریب اور ضرورت مند مریضوں کی خدمت کرنا بڑے اجر کا کام ہے۔ انہوں نے کہا کہ غریب بے سہارا اور ضرورت مند لوگوں کی خدمت کرنے والوں کو اللہ تعالیٰ اجر عظیم سے نوازتے ہیں، کیونکہ مذہب اسلام میں خدمت خلق کو بڑی اہمیت دی گئیں ہے۔ انہوں نے کہا کہ ہم سب کو اپنی حیثیت کے مطابق ضرورت مند لوگوں کی مدد کرنی چاہئے۔ مفتی انس اور ثناء خان نے فیضان میڈی کیئر ہاسپٹل اور اسپرنگ ڈیل پبلک اسکول دیوبند کی جانب سے کی جانے والی عوامی خدمات کی ستائش کی اور اسکول و اسپتال کے ذمہ داران کی حوصلہ افزائی کی۔ اس موقع پر ہاسپٹل کے فائونڈر پرموٹر سعد صدیقی اور احمد صدیقی نے بتایا کہ فیضان میڈی کیئر ملٹی اسپیشیلیٹی ہاسپٹل کی جانب سے وقفہ وقفہ پر اس طرح کے فری میڈیکل کیمپ منعقد کئے جاتے رہے ہیں تاکہ ضرورت مند اور غریب و نادار مریض مفت میں اپنا علاج کرا سکیں، انہوں نے بتایا کہ مستقبل میں بھی اسپتال کی جانب سے اس طرح کے کارِ خیر جاری رکھے جائیں گے۔ اس موقع پر اسپتال کا عملہ موجود رہا۔