شاملی میں ڈاکٹر نے گوگل پر دیکھ کر انجکشن لگا دیا، معصوم بچہ دم توڑ گیا۔

مظفرنگر:  عزیز الرحمن خاں۔

شاملی کے قصبے تھانہ بھون محلہ اشرف کالونی کا رہائشی ایک سالہ بچہ جاں بحق ہوگیا۔ اہل خانہ کا الزام ہے کہ نرسنگ ہوم کے ڈاکٹر نے گوگل کو دیکھ کر انجکشن لگایا جس سے بچے کی حالت بگڑ گئی۔ پانی پت کے نجی اسپتال لے جایا گیا تو ڈاکٹر نے بچے کو مردہ قرار دے دیا۔تھانہ بھون کے محلہ اشرف کالونی میں اپنے ماموں کے گھر میں رہنے والی خاتون کے ایک سالہ بچے کی طبیعت ناساز تھی، جو شاملی کے ایک نجی اسپتال میں زیر علاج تھا۔ جمعہ کو خاندان والے بچے کو قصبے میں واقع ایک نرسنگ ہوم میں لے گئے۔ الزام ہے کہ وہاں موجود ڈاکٹر نے انٹرنیٹ پر دیکھ کر بچے کو انجکشن دیا۔ اہل خانہ کا الزام ہے کہ دونوں انجیکشن ایک ساتھ لگائے جانے تھے لیکن بچے کو صرف ایک انجکشن دیا گیا۔ انجکشن لگتے ہی بچے کی حالت خراب ہونے لگی۔ نرسنگ ہوم کے ڈاکٹر کے ہاتھ کھڑےکرنے کے بعد اہل خانہ بچے کو شاملی لے گئے جہاں ڈاکٹر نے بچے کی سنگین حالت کو دیکھتے ہوئے اسے باہر لے جانے کا مشورہ دیا۔ اس کے بعد گھر والے بچے کو پانی پت کے نجی اسپتال لے گئے، جہاں ڈاکٹروں نے اسے مردہ قرار دے دیا۔ بتایا گیا ہے کہ نرسنگ ہوم میں بے ضابطگیاں پائی گئیں تو کچھ عرصہ قبل اسے سیل کر دیا گیا تھا تاہم کچھ دن بعد نرسنگ ہوم فعال ہو گیا۔ سی ایچ سی کے میڈیکل سپرنٹنڈنٹ ڈاکٹر نوجیت بیدی نے کہا ہے کہ یہ معاملہ انہیں نہیں معلوم تھا۔ دوسری جانب اس سلسلے میں سی ایم او ڈاکٹر سنجے اگروال کا کہنا ہے کہ یہ معاملہ ان کے علم میں نہیں ہے۔ اگر کوئی شکایت موصول ہوئی تو اس کی چھان بین کرکے کارروائی کی جائے گی۔