اب پی ایم مودی بولے: پاکستان راہل گاندھی کو وزیرِ اعظم بنانے کے لئے بے قرار ہے۔

وزیر اعظم نریندر مودی نے جمعرات کو کانگریس لیڈر راہل گاندھی پر بڑا حملہ کیا۔ پی ایم مودی نے کہا ہے کہ پاکستان راہل گاندھی کو وزیر اعظم بنانے کے لیے اتاؤلا ہے۔ پی ایم مودی نے کانگریس کو پاکستان کا پرستار بھی کہا ہے۔ درحقیقت حال ہی میں پاکستان میں عمران حکومت کے سابق وزیر چودھری فواد حسین نے اپنے سوشل میڈیا ہینڈل پر راہل گاندھی کی ایک ویڈیو شیئر کی تھی اور راہل گاندھی کی تعریف کی تھی۔ اب پی ایم مودی نے اس معاملے کو لے کر کانگریس پر بڑا حملہ کیا ۔

پی ایم مودی جمعرات کو گجرات کے آنند شہر میں ایک انتخابی ریلی سے خطاب کر رہے تھے۔ یہاں پی ایم مودی نے طنزیہ انداز میں کہا کہ آج جب کانگریس کمزور ہو رہی ہے، جب یہاں کانگریس مر رہی ہے تو پاکستان رونے  لگتا ہے۔ اب پاکستانی لیڈر کانگریس کے لیے دعائیں کر رہے ہیں۔ راہل گاندھی کو نشانہ بناتے ہوئے پی ایم مودی نے کہا کہ پاکستان شہزادے کو وزیراعظم بنانے کے لیے بے چین ہے۔

پی ایم مودی نے کہا کہ یہ حیرت کی بات نہیں ہے کیونکہ ہم پہلے ہی جانتے ہیں کہ کانگریس پاکستان کی پرستار ہے۔ پی ایم مودی نے کہا کہ پاکستان اور کانگریس کی شراکت بے نقاب ہو گئی ہے۔ اس سے ظاہر ہوتا ہے کہ ملک کے دشمن ہندوستان میں مضبوط نہیں لیکن کمزور حکومت چاہتے ہیں

اپنی ریلی میں پی ایم مودی نے ووٹ جہاد پر سلمان خورشید کی بھانجی ماریہ عالم کے بیان کو بھی نشانہ بنایا۔ پی ایم مودی نے کہا کہ اب اپوزیشن اتحاد ووٹ جہاد کا مطالبہ کر رہا ہے۔ وزیراعظم نے کہا کہ اب تک ہم نے لو جہاد اور لینڈ جہاد کے بارے میں سنا ہے۔ لیکن اب ووٹ جہاد کی اپیل ایک پڑھے لکھے مسلم گھرانے سے تعلق رکھنے والے شخص کی طرف سے کی جا رہی ہے۔ وزیراعظم نے ریلی میں آنے والے لوگوں سے کہا کہ آپ سب جانتے ہیں کہ جہاد کا مطلب کیا ہے۔ کانگریس کے کسی لیڈر نے اس کی مذمت نہیں کی۔