سعودی عرب میں مسلسل بارش سے شدید دشواری، محکمہ موسمیات کی طرف سے ہائی الرٹ جاری، مدینہ منورہ سب سے زیادہ متاثر۔

ریاض: سعودی عرب میں گزشتہ 24 گھنٹوں سے ہو رہی موسلادھار بارش سے لوگوں کوشدیددشواریوں کا سامنا ہے۔ بارش کا سب سے زیادہ اثر مدینہ منورہ کے علاقہ میں دیکھنے کو مل رہا ہے جہاں ہر طرف پانی ہی پانی ہے۔ محکمہ موسمیات کی طرف سے ہائی الرٹ بھی جاری کر دیا گیا ہے۔ اس کے ساتھ ہی ملک بھر میں اسکولوں کو بند کر دیا گیا ہے۔ مدینہ منورہ کے کئی راستے پانی میں پوری طرح ڈوب گئے ہیں جس سے لوگوں کو مشکلات کا سامنا کرنا پڑ رہا ہے۔ مسجد نبوی میں بارش کے وقت کی ایک ویڈیو سوشل میڈیا پر وائرل ہو رہی ہے جس میں لوگوں کو بچتے ہوئے دیکھا جا سکتا ہے۔

دراصل 30 اپریل سے سعودی عرب میں ہو رہی تیز بارش اور طوفان کے سبب کئی علاقوں میں سیلاب کی حالت پیدا ہو گئی ہے۔ متاثرہ علاقوں میں مدینہ منورہ بھی شامل ہے جہاں لوگوں کو کئی طرح کے مسائل کا سامنا ہے۔ سوشل میڈیا پلیٹ فارم پر سعودی کی کئی ویڈیوز وائرل ہو رہی ہیں جس میں سڑکوں پر بھرے پانی، ٹریفک میں رکاوٹ، پانی کے درمیان پھنسی گاڑیاں اور دیگر نظارے دیکھنے کو مل رہے ہیں۔

قابل ذکر ہے کہ 2022 میں بھی سعودی عرب کے شہر جدہ میں بارش کے بعد تباہی والے حالات پیدا ہو گئے تھے۔ تب بارش کے سبب دو لوگوں کی موت بھی ہو گئی تھی۔ یہی وجہ ہے کہ اس مرتبہ سعودی انتظامیہ پوری طرح متحرک ہے۔ شہری تحفظ ڈائریکٹوریٹ نے لوگوں کو احتیاط برتنے اور بہت ضروری ہونے پر ہی گھر سے باہر نکلنے کی اپیل کی ہے۔ سڑکوں پر پانی بھرا ہونے کے سبب کئی علاقوں میں ٹریفک کو پوری طرح سے روک دیا گیا ہے۔