ضمنی الیکشن کے نتائج میں بی جے پی کو ۱۳ میں سے صرف دو سیٹیں، انڈیا گٹھ بندھن نے ماری بازی۔

نئی دہلی: سات ریاستوں کی 13 اسمبلی سیٹوں کے ضمنی انتخابات کے نتائج کا اعلان کر دیا گیا ہے، جس میں کانگریس اور ٹی ایم سی نے 4-4 سیٹوں پر کامیابی حاصل کی ہے۔ جبکہ بی جے پی 2 سیٹیں جیت سکی۔ عام آدمی پارٹی نے جالندھر سیٹ جیت لی ہے۔ مغربی بنگال کی چاروں سیٹوں پر ٹی ایم سی نے قبضہ کر لیا ہے۔ جبکہ ہماچل پردیش میں مقابلہ 2-1 سے تھا، جہاں حکمراں کانگریس نے 2 اور بی جے پی نے ایک سیٹ جیتی۔

ہماچل پردیش میں وزیر اعلیٰ سکھو کی اہلیہ کملیش ٹھاکر نے دیہرا سیٹ سے بی جے پی کے امیدوار کو سخت مقابلے میں 9399 ووٹوں سے شکست دی۔ یہ جائزہ لیں کہ اس الیکشن میں کونسی پارٹی کس ریاست میں جیتی ہے۔

اتراکھنڈ- اتراکھنڈ میں منگلور اور بدری ناتھ سیٹوں پر ضمنی انتخابات ہوئے۔ یہ سیٹیں پہلے کانگریس اور بی ایس پی کے پاس تھیں اور بی جے پی کو سیٹوں پر قبضہ کرنے کا چیلنج درپیش تھا، جس میں وہ کامیاب نہیں ہو سکی۔ بدری ناتھ سیٹ پر کانگریس کے لکھپت سنگھ بٹولا نے بی جے پی کے راجندر بھنڈاری کو 5 ہزار سے زیادہ ووٹوں سے شکست دی۔ راجندر بھنڈاری پہلے یہاں سے ایم ایل اے تھے لیکن بعد میں وہ بی جے پی میں شامل ہو گئے۔دوسری طرف منگلور کی سیٹ جو بی ایس پی ایم ایل اے سربت کریم انصاری کی موت کے بعد خالی ہوئی تھی، کانگریس کے قاضی نظام الدین نے جیتی اور سخت مقابلے میں بی جے پی کے کرتار سنگھ بھڈانہ کو 400 سے زیادہ ووٹوں سے شکست دی۔ قاضی نظام الدین اس سے پہلے تین بار کانگریس کے

ایم ایل اے رہ چکے ہیں۔

ہماچل پردیش- ہماچل پردیش میں کانگریس نے تین میں سے 2 سیٹیں جیت لی ہیں۔ ڈیہرا سیٹ سے سی ایم سکھو کی بیوی نے 9399 ووٹوں سے الیکشن جیتا، جبکہ نالہ گڑھ سیٹ سے کانگریس کے ہردیپ سنگھ باوا نے بی جے پی کو شکست دی۔ ٹھاکر کو تقریباً 9 ہزار ووٹوں سے شکست ہوئی۔ ہمیر پور میں بی جے پی کے آشیش شرما نے کانگریس کے پشپیندر ورما کو سخت مقابلے میں 1571 ووٹوں سے شکست دی۔ پہلے یہ تینوں سیٹیں آزاد امیدواروں کے پاس تھیں۔

مغربی بنگال: حکمراں ترنمول کانگریس نے ریاست میں چار اسمبلی سیٹوں پر کلین سویپ کیا ہے۔ رائے گنج، بگڈا، راناگھاٹ اور مانیک تلہ سیٹوں پر ٹی ایم سی امیدواروں نے شاندار کامیابی حاصل کی ہے۔ رائے گنج سیٹ سے ٹی ایم سی امیدوار کرشنا کلیانی نے بی جے پی امیدوار مانس کمار گھوش کو 49 ہزار سے زیادہ ووٹوں کے فرق سے شکست دی۔

وہیں ٹی ایم سی امیدوار مدھوپرنا ٹھاکر نے بگڈا سیٹ پر 33455 ووٹوں سے کامیابی حاصل کی۔ اس کے علاوہ رانا گھاٹ سے ٹی ایم سی کے مکوت منی نے بی جے پی کے منوج کمار بسواس کو تقریباً 39 ہزار ووٹوں سے شکست دی۔ مانیکتلہ سیٹ پر ٹی ایم سی کی سپتی پانڈے نے بی جے پی کے کلیان چوبے کو 41406 ووٹوں سے شکست دی۔

٭پنجاب- جالندھر ویسٹ سیٹ سے عام آدمی پارٹی کے مہندر بھگت نے بی جے پی کی شیتل انگورل کو تقریباً 37 ہزار ووٹوں سے شکست دی۔ پہلے یہ سیٹ عام آدمی پارٹی کے پاس تھی اور شیتل یہاں سے ایم ایل اے تھیں لیکن بعد میں وہ بی جے پی میں شامل ہوگئیں جس کے بعد یہاں ضمنی انتخاب ہوا۔

بہار- بہار کی روپولی سیٹ پر بڑا اپ سیٹ ہوا ہے، یہاں جے ڈی یو اور آر جے ڈی جیسی پارٹیوں کو پیچھے چھوڑتے ہوئے آزاد امیدوار شنکر سنگھ جیت گئے ہیں۔ جے ڈی یو کے کالادھر منڈل دوسرے نمبر پر رہے جبکہ اس سیٹ سے ایم ایل اے بیما بھارتی تیسرے نمبر پر رہیں۔ یہاں کی سیٹ بیما بھارتی کے جے ڈی یو میں شامل ہونے کی وجہ سے خالی ہوئی تھی۔ بیما بھارتی نے لوک سبھا الیکشن بھی لڑا تھا لیکن وہاں بھی وہ تیسرے نمبر پر رہی۔

تمل ناڈو- حکمراں ڈی ایم کے نے تمل ناڈو کی وکراونڈی سیٹ جیت لی ہے۔ ڈی ایم کے کے اینیور سیوا شیواشنموگم کی انبومنی۔ سی کو 50 ہزار سے زائد ووٹوں سے شکست دی۔

مدھیہ پردیش- مدھیہ پردیش کی امرواڑہ سیٹ کا بھی نتیجہ آ گیا ہے۔ مدھیہ پردیش کے چھندواڑہ کی امرواڑا سیٹ پر ووٹوں کی گنتی سے یہ بات سامنے آئی ہے کہ بی جے پی کے کملیش شاہ 3252 ووٹوں سے جیت گئے ہیں جبکہ کانگریس کے دھیرن شاہ ہار گئے ہیں۔ کانگریس نے 2023 کے اسمبلی انتخابات میں امرواڑا سیٹ جیتی تھی لیکن کملیش پرتاپ بعد میں بی جے پی میں شامل ہو گئے جس کے بعد یہ سیٹ خالی ہو گئی۔