دیوبند کا عید گاہ روڈ کافی دنوں سے خستہ حالی کا شکار، علاقہ کے لوگ سخت پریشان۔

دیوبند کا عید گاہ روڈ کافی دنوں سے خستہ حالی کا شکار، علاقہ کے لوگ سخت پریشان۔

دیوبند:(سمیر چودھری)

دیوبند کا خستہ حال عیدگاہ روڈ عوام کے لیے پریشانی کا باعث بنا ہواہے، علاقہ کے لوگوں میں بلدیہ کے خلاف غصہ ہے اور سڑک کی مرمت کرنے کا مطالبہ کیا ہے۔دیوبند قاسم پور روڑ پر عیدگاہ کے قریب سڑک کی خراب حالت سے لوگ پریشان ہیں جس کی وجہ سے علاقہ میں بلدیہ کے خلاف ناراضگی بڑھ رہی ہے۔ لوگوں نے میونسپل انتظامیہ سے مسئلہ حل کرنے کا مطالبہ کیا ہے۔

محلہ خانقاہ سے ہوتی ہوئی قاسم پور اور دیگر دیہاتوں اور شاہراہوں کو ملانے والی سڑک عیدگاہ کے قریب گڑھوں میں تبدیل ہو گئی ہے۔ جس کی وجہ سے پیدل چلنے والوں، قریبی دکانداروں اور گاڑی چلانے والوں کو پریشانی کا سامنا کرنا پڑتاہے۔ صورتحال یہ ہے کہ سڑک پر بنے گڑھے ہر وقت گندے اور گندے پانی سے بھرے رہتے ہیں جس کی وجہ سے وبائی امراض پھیلنے کا خدشہ ہے۔

مذکورہ سڑک پر کالج بھی ہے، ٹوٹی پھوٹی سڑک سے طلبہ کا گزرنا مشکل ہے۔ اس راستے پر کئی بینکٹ ہال بھی بنائے گئے ہیں۔ شادی کی تقریب میں آنے والے لوگوں کو مذکورہ راستے سے گزرنے میں بھی پریشانی کا سامنا کرنا پڑتا ہے۔ علاقہ کے لوگوں اور قریبی دکانداروں شاہنواز، ارشد، عبدالنصیر، عالم، منظور وغیرہ کا کہنا ہے کہ بلدیہ انتظامیہ کو بارہا شکایات کے باوجود مسئلہ حل نہیں ہو رہا ہے۔ انہوں نے انتباہ دیا کہ اگر مسئلہ حل نہ ہوا تو بلدیہ کے خلاف تحریک چلائی جائے گی۔