ریلوے وزیرکا دیوبند میں’وندے بھارت ‘ کے اسٹاپیج کا اعلان، پی ایم مودی کی قیادت میں ہندوستان دنیا کی بڑی معیشت کی جانب گامزن:اشونی ویشنو۔

دیوبند: سمیر چودھری۔

مرکزی وزیر ریلوے اشونی ویشنو نے دیوبند میں میڈیا نمائندوں سے گفتگو کرتے ہوئے مرکز میں مودی حکومت کے عوامی فلاحی کاموں کے متعلق معلومات دی۔ اس دوران انہوں نے کہا کہ پچھلے نو سالوں میں ہندوستان معاشی ترقی کرتے ہوئے دسویں نمبر سے پانچویں بڑی معیشت بن گیا ہے۔ جبکہ اگلے تین سالوں میں ہندوستان دنیا کے پہلے تین بہتر معیشت والے ممالک میں شامل ہو جائے گا۔اس موقع پر ریلوے وزیر نے دیوبندمیں وندے بھارت ٹرین کے اسٹاپیج کااعلان کیا۔انڈسٹریل ایریا میں واقع ایک اسکول میں میڈیا بات کرتے ہوئے انہوں نے کہا کہ ڈاکٹر منموہن سنگھ چاہے کتنے ہی بڑے ماہر معاشیات کیوں نہ رہے ہوں لیکن مودی حکومت نے ہمارے ملک کو پانچ بڑی معیشت والے ممالک کی فہرست میں شامل کرکے ملک کا سر فخر سے بلند کیا ہے۔ انہوں نے کہا کہ چاہے کووڈ کے دوران 220 کروڑ مفت ڈبل ڈوز ویکسین لگانے کا ریکارڈ ہو یا ملک کے 80 کروڑ لوگوں کو مفت راشن دینے کا کام، یہ کام صرف مودی حکومت ہی کر سکتی تھی۔ انہوں نے کہا کہ ملک میں مودی حکومت اور ریاست میں یوگی حکومت ترقی کے معاملے میں سب سے اوپر ہے۔ انہوں نے دیوبند میں وندے بھارت کو روکنے کا اعلان کیا اور جلد ہی سہارنپور سے پریاگ راج تک وندے بھارت کو روکنے کا اعلان کیا۔ انہوں نے کہا کہ سہارنپور سے شاہ کمبری دیوی تک ریلوے لائن کے سروے کے لیے فنڈز جاری کیاجا رہے ہیں۔ انہوں نے کہا کہ مودی حکومت کسانوں کی بہتری کے لیے ایک سے بڑھ کر ایک اسکیمیں چلا رہی ہے۔ جس کی مثال یہ ہے کہ نو سالوں میں یوریا کی قیمت میں ایک روپے کا بھی اضافہ نہیں ہوا۔ انہوں نے کہا کہ نریندر مودی کی حکومت ملک کے ترقیاتی کاموں کو چیلنج کے طور پر لے رہی ہے۔ یہی وجہ ہے کہ آج پی ایم مودی کی قیادت کو ملک کے اندر اور باہر تسلیم کیاگیاہے۔ انہوں نے کہا کہ ملک ترقی کی تبدیلی کے دور سے آگے بڑھ رہا ہے۔ اس دوران پی ڈبلیو ڈی کے وزیر مملکت کنور برجیش سنگھ، بی جے پی کے ریاستی نائب صدر موہت بینیوال، سابق ایم پی راگھو لکھن پال شرما، ایم ایل اے دیویندر نیم، بی جے پی ضلع صدر ڈاکٹر مہندر سنگھ سینی اور دیگر عہدیدار اور کارکنان موجودرہے۔