دیوبند کے مسلم علاقوں میں گندگی کا انبار، میونسپل انتظامیہ کی لاپرواہی کی وجہ سے مسلم اکثریتی علاقے میں سڑکیں بھی خستہ حال۔

دیوبند: سمیر چودھری۔

دیوبندمیونسپل انتظامیہ کی عدم توجہی کے باعث شہر میں صفائی کا نظام خراب ہوگیا، اس کا خمیازہ عوام کو بھگتنا پڑ رہا ہے۔ خاص طور پر مسلم اکثریتی علاقوں میں صفائی کی حالت ابتر ہے۔ بلدیہ کے ممبران کا کہنا ہے کہ بلدیہ میں ان کی بھی کسی سطح پر سنوائی نہیں ہو رہی۔مذہبی شہر دیوبند میں صفائی کا مناسب نظام نہ ہونے کی وجہ سے جگہ جگہ کچرے کے ڈھیر لگے ہوئے ہیں اور گندگی سے بھری نالیاں بین الاقوامی شہرت یافتہ شہر دیوبند کے نام پر داغ ہیں۔ لیکن اس سب کا میونسپل انتظامیہ پر کوئی اثر ہوتا نظر نہیں آتا۔ خاص طور پر مسلم اکثریتی علاقوں میں صفائی کا نظام انتہائی ناقص ہے اور کئی علاقوں کی سڑکیں مکمل طور پر گڑھوں میں تبدیل ہو چکی ہیں۔ لیکن حکام اس سے آنکھیں چرا رہے ہیں۔ وارڈ نمبر 14 کی ممبر ریحانہ کے شوہرشرافت ملک کا الزام ہے کہ ان کے وارڈ میں صفائی کی حالت خراب ہے۔ صفائی نہ ہونے کی وجہ سے پورے وارڈ میں گندگی کے ڈھیر لگے ہوئے ہیں۔ ان کا کہنا ہے کہ اس سلسلے میں میونسپل حکام کو متعدد بار شکایات کی گئی ہیں لیکن اسے سنجیدگی سے نہیں لیا جاتا ہے۔ انہوں نے بلدیہ کے صدر وپن گرگ کو شکایتی خط دیا ہے، جس میں وارڈ میں تعینات صفائی نائک پر لاپرواہی کا الزام لگایا گیا ہے اور ان کی جگہ ایک اور صفائی نائک کی تقرری کا مطالبہ کیا گیا ہے۔ ساتھ ہی وارڈ نمبر 13 کے لوگوں نے دارالعلوم وقف کو جانے والی مین سڑک کی تعمیر کا مطالبہ کیا ہے جو کہ مکمل طور پر گڑھوں میں تبدیل ہو چکی ہے۔ اس سلسلے میں جب بلدیہ صدر سے فون پر بات کرنے کی کوشش کی گئی تو ان سے رابطہ نہیں ہوسکا ۔