ڈی ایم نے پڑھایا ضابطہ اخلاق کا سبق، ایس ایس پی نے کہاکہ انتخابات کے دوران سخت ہوگی سیکوریٹی۔

دیوبند: سمیر چودھری۔

لوک سبھا انتخابات کی تاریخوں کے اعلان کے بعد ضلع انتظامیہ نے تیاریاں شروع کر دی ہیں۔آج ضلع الیکشن افسر ڈاکٹر دنیش چندرا نے کلکٹریٹ واقع نئے آڈیٹوریم میں انچارجوں، شریک انچارجوں اور سیاسی جماعتوں کے نمائندوں کے ساتھ میٹنگ کی۔ڈسٹرکٹ الیکشن آفیسر ڈاکٹر دنیش چندرا نے بتایا کہ ووٹر ہیلپ لائن ایپ کے ذریعے ووٹر بننے کے لیے آن لائن درخواست دے سکتے ہیں۔ ضابطہ اخلاق کی خلاف ورزی کی شکایات سی ویزل ایپ کے ذریعے کی جا سکتی ہیں۔ اس میں درج ہونے والی شکایات کو 100 منٹ میں حل کیا جائے گا۔ انتخابات کا نوٹیفکیشن 20 مارچ کو جاری ہوگا، 27 مارچ کو کاغذات نامزدگی، 28 مارچ کو کاغذات نامزدگی کی جانچ پڑتال، 30 مارچ کو کاغذات نامزدگی واپس لینے، 19 اپریل کو ووٹنگ اور 4 جون کو ووٹوں کی گنتی ہوگی۔ انہوں نے کہا کہ مساجد، گرجا گھروں، مندروں اور دیگر عبادت گاہوں کو انتخابی مہم کے پلیٹ فارم کے طور پر استعمال نہیں کیا جائے گا۔کوئی بھی جماعت ان جگہوں کے ارد گرد جلوس نہ نکالے جہاں دوسری جماعتوں کے جلسے منعقد ہو رہے ہوں۔ کسی بھی پارٹی کے کارکن دوسری جماعتوں کے کارکنوں کے لگائے گئے پوسٹرز نہیں ہٹائیں گے۔ ایس ایس پی ڈاکٹر وپن تاڈا نے کہا کہ لوک سبھا انتخابات کے دوران سیکورٹی کے انتظامات سخت ہوں گے۔ اس موقع پر اے ڈی ایم انتظامیہ ڈاکٹر ارچنا دویدی، اے ڈی ایم فائنانس اینڈ ریونیو رجنیش کمار مشرا، جوائنٹ مجسٹریٹ اتسو آنند، سٹی مجسٹریٹ گجیندر کمار، ایس پی سٹی ابھیمنیو مانگلک، ایس پی دیہات ساگر جین وغیرہ موجود رہے۔