دیوبند: نئی نویلی دلہن کو لیکر دولہا ہوا فرار، پہلی بیوی نے جم کر کیاہنگامہ، دولہے کے والد اور بھائی و بہنوئی کو پولیس نے حراست میں لیا۔

دیوبند: سمیر چودھری۔

تیسری شادی کرکے دولہا اپنی نئی نویلی دلہن کو لیکر فرار ہوگیا،جبکہ اس کی پہلی بیوی نے جم کر ہنگامہ کیا۔ اطلاع ملنے پر پولیس نے موقع پر پہنچ کر دولہے کے والد، بھائی اور بہنوئی کو حراست میں لے لیا۔معاملہ دیوبند کوتوالی علاقہ کے چندینا کولی گاوں کا ہے۔ منگل کو سہارنپور کے ہمت نگر کا رہنے والا جاوید اپنے اہل خانہ کے ساتھ یونس کی بیٹی ثمرین نکاح کے لیے چندینا کولی گاوں پہنچاتھا۔ یہاں نکاح کی تمام رسومات مکمل کی گئیں۔ مہمان کھانا کھا رہے تھے۔ اسی دوران جاوید کی پہلی بیوی ساجدہ جو کہ یمنا نگر کی رہنے والی ہے اپنی ماں اور بھائیوں کے ساتھ وہاں پہنچ گئی۔ اس دوران اس نے ہنگامہ شروع کر دیا۔ یہ دیکھ کر جاوید خاموشی سے نئی دلہن کو وہاں سے لے کر بھاگ گیا۔ اطلاع ملنے پر پولیس موقع پر پہنچ گئی اور جاوید کے والد جہانگیر، بھائی ثاقب اور بہنوئی غالب کو حراست میں لے لیا۔ پولیس پوچھ گچھ کے دوران ساجدہ نے بتایا کہ اس کی شادی جاوید سے 2020 میں ہوئی تھی۔ لیکن شادی کے چھ ماہ بعد ان کے درمیان جھگڑا ہوگیا۔ جس کی وجہ سے وہ اپنے والدین کے گھر آکر رہنے لگی۔ ان کا کیس عدالت میں زیر سماعت ہے۔ کچھ عرصے بعد جاوید نے پہلے شادی کی بات چھپائی اور سہارنپور کی نور بستی کی رہنے والی سپنا سے شادی کی۔ لیکن اس کے گھر والوں کو معلوم ہوا کہ وہ شادی شدہ ہے۔ جس کی وجہ سے لڑکی کے گھر والوں نے اسی لمحے فیصلہ کر لیا تھا۔ اب جاوید نے چندینا کولی میں ثمرین سے شادی کر لی ہے۔ پولیس کا کہنا ہے کہ ساجدہ اور جاوید کے اہل خانہ کے درمیان تصفیہ کے حوالے سے بات چیت جاری ہے۔ شکایت موصول ہوئی تو کارروائی کی جائے گی۔ بتایا گیا ہے کہ جس لڑکی سے جاوید کا نکاح ہوا ہے وہ رشتہ میں اس کے بہنوئی کی بہن لگتی ہے۔