ڈاکٹر نواز دیوبندی ’سہارنپور گورو‘ اعزاز سے سرفراز، ڈاکٹر نواز دیوبندی نے نسل نو کو نئی سمت دکھانے کا کام کیاہے: پدم شری بھارت بھوشن۔

دیوبند: سمیر چودھری۔

تاریخی میلہ گوگھال کے موقع پر سہارنپور کے جن منچ ہال میں منعقد ’میرا سہارنپور میراگورو‘ پروگرام میں عالمی شہرت یافتہ شاعر و ماہر تعلیم ڈاکٹر نواز دیوبندی کو ان کی تعلیمی اور ادبی خدمات کے اعتراف میں ”سہارنپورگورو“ اعزاز سے سرفراز کیا گیا۔ 

ڈاکٹر نواز دیوبندی کو یہ اعزاز معروف شخصیت یوگ گرو پدم شری بھارت بھوشن، ریاستی وزیر جسونت سنگھ اور سہارنپور کے میئر ڈاکٹر اجے کمار کے بدست دیا گیا۔ ڈاکٹر نواز دیوبندی کو یہ اعزاز ملنے پر ان کے چاہنے والوںنے خوشی کااظہار کرتے ہوئے انہیں مبارکباد پیش کی۔ پروگرام میں پدم شری بھارت بھوشن نے اپنے خیالات کا اظہار کرتے ہوئے کہا کہ ڈاکٹر نواز دیوبندی نے اپنی شاندار شاعری کی بدولت پوری دنیا میں اپنے ملک ہندوستان اور ضلع سہارنپور کا نام روشن کیا ہے۔ انہوں نے کہا کہ اپنی شاعری سے نسل نو کو نئی سمت دکھانے کا فریضہ انجام دیا ہے۔ اس کے علاوہ ڈاکٹرنواز دیوبندی نے سماجی اور تعلیمی میدان میں بیش قیمت خدمات انجام دی ہیں جن کے اعتراف میں انہیں آج سہارنپور گورو کے اعزاز سے سرفراز کیا گیا۔ ریاستی وزیر جسونت سنگھ اور شہر میئر ڈاکٹر اجے کمار نے بھی ڈاکٹر نواز دیوبندی کی شخصیت اور انکی ادبی، سماجی وتعلیمی خدمات پر روشنی ڈالی اور کہا کہ ہم سب کی نیک خواہشات ان کے ساتھ ہیں ۔ ہمیں امید ہے کہ ڈاکٹر نواز دیوبندی آئندہ بھی اسی طرح سماجی ادبی وتعلیمی خدمات انجام دیتے رہیں گے۔ وہیں ڈاکٹر نواز دیوبندی کو ’سہارنپور گورو‘ اعزاز ملنے پر ان کے چاہنے والوں نے خوشی کااظہار کرتے ہوئے مبارکباد پیش کی ہے۔