دارالعلوم دیوبند کے شیخ الحدیث ثانی حضرت علامہ قمرالدین گورکھپوری کی وفات۔

دیوبند: 22/دسمبر (سمیر چودھری) 

نہایت افسوس کے ساتھ یہ اطلاع دی جاتی ہے کہ دارالعلوم دیوبند کے قدیم کہنہ مشق استاذ شیخ الحدیث ثانی حضرت علامہ قمر الدين صاحب علیہ الرحمہ کا آج بتاریخ 22 دسمبر بروز اتوار صبح فجر کے وقت محلہ دیوان دیوبند میں واقع اپنی رہائش گاہ پر اِنتقال ہو گیا ہے۔ اناللہ وانا الیہ راجعون۔ مرحوم تقریبا 85 برس کے تھے اور ان کی علمی خدمات کا سلسلہ نصف صدی سے زائد رہا ہے۔ دارالعلوم دیوبند میں انہیں ایک مقبول استاذ کی حیثیت سے ہمیشہ یاد رکھا جائے گا۔

حضرت علامہ قمرالدین صاحب پچھلے کچھ دنوں سے سخت علیل تھے مظفرنگر سمیت متعدد اسپتالوں میں زیر علاج تھے۔ جہاں سے دو دن قبل انہیں تشویشناک حالت کے سبب ڈاکٹروں نے گھر بھیج دیا تھا۔

صحت سے متعلق تشویشناک خبریں موصول ہورہی تھیں آج وہ دار فانی کو الوداع کہہ گئے۔ دعاء فرمائیں کہ اللہ تعالیٰ بال بال مغفرت فرمائے اور لواحقین کو صبر جمیل عطا فرمائے اور جنت الفردوس میں اعلیٰ مقام عطا فرمائے اور حضرت کے تمام خدمات کو قبول فرمائے دارالعلوم دیوبند کو نعم البدل عطاء فرمائے۔ آمین ثم آمین یا رب العالمین…….

مرحوم نے دارالعلوم دیوبند میں تقریباً 50 سال تک تدریسی خدمات انجام دی ہیں۔ آپ کے تلامذہ کی تعداد لاکھوں میں ہے۔

دارالعلوم دیوبند کے مہتمم و شیخ الحدیث حضرت مولانا مفتی ابوالقاسم نعمانی، صدر مدرسین مولانا سید ارشد مدنی سمیت سرکردہ علماء نے حضرت علامہ کے انتقال پر گہرے رنج و علم کا اظہار کیا۔ مرحوم کی رہائش گاہ صدر گیٹ سے متصل واقعے محلہ دیوان میں علماء طلباء کا جم غفیر ہے۔

اطلاع کے مطابق مرحوم کی نماز جنازہ بعد نماز ظہر احاطہ مولسری دارالعلوم دیوبند میں ادا کی جائے گی۔

سمیر چودھری۔